Орто Халыма улууһун 2-с Хаҥалас нэһилиэгиттэн Тааттаҕа ыытыллыбыт XXII Манчаары оонньууларыгар ситиһиилээхтик кыттан, үрүҥ көмүс мэтээли кэтэн, Орто Халыма улуус хамаандата бэйэтин бөлөҕөр иккис миэстэни ситиһэригэр сүдү күүс буолбут, күрэсчит кыргыттарбытын Ольга Степановна Гуляеваны уонна Елена Николаевна Иванованы (Гуляеваны) чиэстиир үөрүүлээх киэhэ Эбээххэ ыытылынна.
Үөрүүлээх көрсүҺүү кыргыттарбытын вертолетунан көтөн кэлэн түҺэллэригэр порка киирбит дьон бары уруйдаан- айхаллаан көрсүүнэн саҕаламмыта. Кулуупка төһө да от үлэтин кэмэ буоллар оҕолуун улахан дьоннуун бары мустан, ытыс тыаһынан көрүстүлэр.
Олохтоох дьаһалта баһылыга Юрий Алексеевич Гуляев эҕэрдэ тылы этэн, инникитигэр өссө да ситиҺиилэри баҕаран туран, уоннуу тыһыынчалаах сертификат туттарда . Кыргыттар иккиэн кыра эрдэхтэриттэн биир кылааска үөрэнэн, успуорка хайдах киирсибиттэрин, Тааттаҕа Манчаары оонньуутун тэриллиитин, ситиһиилэрин, инники былааннарын кэпсээтилэр.
Елена Николаевна икки оҕолоох ыал ийэтэ, улахана алталаах уол, кырата 1,5 саастаах, саҥа хааман тоотоллор кыыс. Ольга 16 саастаах уола тохсус кылааһы бүтэрдэ, ийэтин утумнаан гиирэнэн дьарыктанар. Маны таһынан, ырыа бөҕө ылланна, аймахтара, эдэр ыччаттар, кулууп кэлэктиибэ, биир түөлбэ олохтоохторо, «Соседи» маҕаһыынтан эҕэрдэ тыллар этиллэн, сэмэй бэлэхтэр туттарылыннылар.
Көрсүһүү кэнниттэн түөлбэнэн кыра оҕотуттан 60 саастарын ааспыт дьахталларга тиийэ 10 этаптаах сүүрүүгэ эстафета ыытылынна. Улахан ыһыылаах- хаһыылаах сүүрүүгэ «Дьүкээбил» түөлбэ бастаан, кыайыы үөрүүтүн биллэ, иккис миэстэни «Сарыал», үһүс миэстэни «Саһарҕа» уонна «Кэскил» түөлбэ олохтоохторо 4 миэстэ буолан үөрэн-көтөн тарҕастылар.
Манна даҕатан эттэххэ, Эбээхтэн Манчаары оонньууларыгар араас сылларга кыттыбыт күрэсчит ахсаана элбээбит эбит. Ол курдук, 2009 сыл Бүлүү куоракка ыытыллыбыт оонньууга мас тардыһыыга Клара Алексеевна Слепцова үһүс миэстэ ылары ситиспитэ. Оттон Родион Михайлович Третьяков, Василий Иванович Богатырев мас тардыһыытыгар, Дмитрий Иванович Никитин хотугу дэгит күрэскэ кыттыыны ылбыттара. Дмитрий Дмитриевич Слепцов 2013 сыл Чурапчыга гиирэҕэ, 2017 сыл Үөһээ Бүлүүгэ гиирэҕэ, 2021 сыл Горнайга гиирэ уонна мас тардыһыыга, оттон кини балта Роксана 2017 уонна 2021 мас тардыһыыга киирсибиттэрэ. Мантан да көрдөххө, Хаҥаластар күүстээхтэрин аатын ааттатар ыччаттардаах эбиппит диэн астынабыт, киэн туттабыт. Күрэсчиттэргэ өссө да успуорка дьулууру, тулууру уонна ситиһиилэри, олохторугар дьолу баҕарабыт!
Ааптар: Людмила Никитина, Эбээх бөһ.