От ыйын 9 күнүттэн ытык Таатта туонатыгар XII-с төгүлүн «Манчаары оонньуулара» ыытыллар. Национальнай оонньуу спартакиадатыгар биһиги улууспутун 35 спортсмен 8 көрүҥҥэ (хапсаҕай, гиирэни анньыы, мас тардыһыы, атах оонньуулара, сүүрүү, национальнай уонна хотугулуу дэгит көрүҥ (многоборье), буулдьа саанан ытыы) көмүскүүр.
Бу күн туругунан хамаанда бастыҥ үрүҥ көмүс мэтээллэрин Иккис Хаҥалас нэһилиэгиттэн төрүттээх кэрэ аҥардар, гиирэ анньыыга Елена Иванова (Гуляева), мас тардыһыыга Ольга Гуляева II-с миэстэни ситистилэр.
Гиирэ успуордугар Арассыыйа уонна СӨ «Сахаада-успуорт» успуордун маастара, СӨ гиирэ успуордун үрдүк категориялаах старшай тириэньэрэ Елена Иванова (Гуляева) биһиги эрэдээксийэбитигэр кыттыытын туһунан бэйэтин сыанабылын кэпсээтэ:
«Мин Манчаары оонньууларыгар 58 киилэ ыйааһыннаах кэрэ аҥардарга, 24 киилэлээх гиирэни 60-на анньан II-с миэстэ буоллум.
Кыттыыбыттан астымматым, чөмпүйүөн аатын ылар санаалааҕым, кыаттарбата. Быйыл сүүмэрдээһини ааспатаам ол иһин дьарыгым ситэтэ суох диэн сыаналанным.
Идэбинэн успуорт оскуолатыгар тириэньэрдиибин. Ону таһынан улахан дьону кытта дьарыктыыбын. Өрөспүүбүлүкэтээҕи хамаанда чилиэнинэн буолабын. Дьарыктыыр дьоммуттан манна биэс киһи кытта сылдьар. Бэҕэһээ биир иитээччим III-с миэстэ буолбута. Мин Манчаары аатынан күрэхтэһиигэ бэһиспин кытта сылдьабын. 2017, 2021 сылларга бастаабытым. 2009с. мас тардыһыытыгар III-с миэстэ буолбутум. 2013 сыллаахха гиирэҕэ III- тээбитим. Быйыл биир кэрдиис үөһэ таҕыстым. Спорстменнарга ситиһиини баҕарабын. «Төрөөбүт улууспут туһугар!», — диэн баран түһүнэн кэбиһиэҕиҥ», — диэн эрэдээксийэҕэ быыс булан санаатын үллэһиннэ.
От ыйын 10 күнүттэн Хапсаҕай саҕаланна. Бу көрүҥҥэ биһиги улууспутуттан 12 бөҕөс киирэрэ былааннанар.