— Елена Николаевна, эйиигин ситиһиилээхтик кыттан, хамаандаҕа бастакы мэтээл аҕалбыккынан биир дойдулаахтарыҥ ааттарыттан истиҥник эҕэрдэлиибин. Күрэс туһунан санааҕын хаһыат ааҕааччыларыгар тириэрдэргэр көрдөһөбүн.
— Мин бу Тааттаҕа XXII Манчаары оонньууларыгар кэлэн, 58 киилэлээх дьахталлар ортолоругар 24 киилэлээх гиирэни 60-на астым. Кыттыыбыттан астымматым, чөмпүйүөн үрдүк аатын ылар санаалааҕым, кыаттарбата.
— Успуорт диэн оннук буоллаҕа. Үрүҥ көмүс мэтээлиҥ да үрдүк сыаналаах. Хайдах бэлэмнэммиккиний?
— Миигин дьиэ кэргэним бэркэ өйүүр, кинилэргэ махталым муҥура суох. Кыһын ийэм кэлэн, оҕолорбун көрөргө көмөлөспүтэ. Кэргэним күрэхтэһиигэ ыыппыта, улахан болҕомтону кыра оҕобут эрэйэр. Быйыл хомуллан күүскэ бэлэмнэнии диэни ааспатым. Онон дьарыгым арыычча ситэтэ суох диэхпин сөп.
— Арассыыйаҕа Дьиэ кэргэн күнүгэр үрүҥ көмүс мэтээли ситиспитиҥ, онон эйигин уонна дьоҥҥун эҕэрдэлиибит. Кыа-йыыгын кинилэргэ анаатаҕыҥ. Дьиэ кэргэниҥ туһунан кыратык кэпсии түс.
— Төрөппүттэрим төрүт Иккис Хаҥалас олохтоохторо. Аҕам Гуляев Николай Николаевич оскуолаҕа олоҕун тухары учууталлаабыта. Ийэм Евдокия Прокопьевна сүүрбэ сыл ыанньыксытынан үлэлээн, элбэх наҕараадалаах. Биһигини бэркэ маанылаан ииппиттэрэ. Эдьиийим да, балтым да кыһыл дьупулуомнаах үөрэхпитин түмүктээн, анал идэни ылбыппыт. Кэргэним Алексей Гаврильевич Үөһээ Бэстээхтэн. Уолбут Николай алта сааһын, кыыспыт Алина биир сааһын өтөр аҕай туолтара.
— Кыра оҕолоох буолан, дьиэҕэ олороҕун ду?
— Суох олорбоппун, оҕом биэс ыйыгар үлэбэр төннүбүтүм. Мин идэбинэн үлэлии сылдьабын. Успуорт оскуолаҕа тириэнньэрдиибин. Ону таһынан улахан дьоҥҥо эмиэ. Өрөспүүбүлүкэ хамаандатын чилиэнэ буолабын. Дьарыктыыр дьоммуттан биэс киһи бу күрэххэ ситиһиилээхтик кытыннылар.
— Эн хаһыс төгүлүн Манчаары оонньууларыгар кытынныҥ?
— Бэһис төгүл: иккитэ — 2017, 2021 сс – гиирэҕэ кыайбытым. 2009 с. мас тардыһыытыгар үһүс миэстэ буолтум. 2013 с. гиирэҕэ үһүстээбитим. Быйыл үрүҥ көмүс мэтээли ситистим.
— Елена, кэпсэтииҥ, кыайыыҥ иһин махтал. Бэйэҕэр уонна дьиэ кэргэҥҥэр доруобуйаны, ситиһиилэри, дьоллоох олоҕу баҕарабыт.
Ааптар: Светлана Третьякова