Ыспыраапка: Ольга Степановна Гуляева, 38 саастаах, И. Слепцов — Учуунускай аатынан кулууп үлэһитэ, үс төгүл Манчаары оонньууларыгар мас тардыһыытыгар ситиһиилээхтик кытынна: 2013 с. Чурапчыга XIX күрэскэ үһүс миэстэ, 2017 с. Үөһээ Бүлүүгэ XX үбүлүөйдээх күрэскэ иккис буолары ситиспитэ. 2025 сыллаахха Тааттаҕа XXII Манчаары оонньууларын 85 киилэттэн үрдүк ыйааһыннаах дьахталларга мас тардыһыытыгар иккис миэстэ.
— Ольга Степановна, эйиигин Тааттаҕа Манчаары оонньууларыгар үрүҥ көмүс мэтээли ситиспиккинэн истиҥник эҕэрдэлиибит! Кыайыам диэн эрэллээх этиҥ дуо?
— Кырдьыкпынан эттэххэ, олох мэтээлгэ тиксиэм диэн санаа суоҕа. Өрөспүүбүлүкэ биллиилээх мадьыны дьахталларын кытта киирсиэхтээхпин билэрим. Бастакы тардыһыыбар сыыйылларым буолуо дии саныырым. Икки киһини кыайбыппыттан наһаа соһуйтум, үөртүм. Кыһыл көмүс иһин киирсиигэ аан дойду күрэҕин кыайыылааҕын, биллиилээх Анатолий Баишев кыыһын Татьянаны кытта көрсөрүм долгутуулаах этэ. Күүһэ-уоҕа, бэлэмнэниитэ, ыйааһына да миигиттэн икки төгүл курдук элбэҕэ.
— Оччотугар бу күрэххэ хайдах бэлэмнэнниҥ?
— Улахан бэлэмнэниим диэн суоҕун кэриэтэ. Тыа киһитин быһыытынан, оту-маһы кытта тардыалаһыы күүстээх үлэтэ. Бастаан, гиирэ анньыытыгар дьарыктана түспүтүм. Хатаска мас тардыһыытыгар күүстээх бэлэмнэ-ниини биир ый ааспытым. Онно күрэххэ иккис миэстэ буолбутум, Манчаары оонньууларыгар киирэргэ көҥүл ылбытым.
Дьиэ кэргэниҥ туһунан кэпсэтэ түһүөххэ.
Төрөппүттэрбин, оҕобун кытта Эбээх бөһүөлэгэр олоробут. Аҕам – Гуляев Степан Степанович, ийэм Капитолина Васильевна, иккиэн биэнси-йэлээхтэр. Уолум Тамерлан 15 саастаах, мас тардыһыытынан, гиирэ анньыытынан үлүһүйэр.
— Иллэҥ кэмҥэр тугунан дьарыктанаҕын?
— Бэс маһын кыһан, быһан, араас маллары оҥоробун. Ким да бу дьарыкпар үөрэппэтэҕэ, куйаар да ситиминэн көрөн, үөрэх ылбатаам. Бэйэм толкуйбунан, сатабылбынан араас кашполары, дьиэ, олбуор тэрилин, беседканы оҥортуубун. Матырыйаалбын сакаастаан атыылаһарбар син уустуктар-даах. Ол эрээри дьарыкпын бырахпаппын, саҥаттан саҥаны бэйэҥ оҥорон таһаарарыҥ туспа дьол.
— Кэпсэтиигэр, умнуллубат чаҕылхай түгэннэри бэлэхтээбиккэр махтал. Доруобуйаны, дьолу эйиэхэ уонна дьиэ кэргэҥҥэр баҕарабыт.
Ааптар: Светлана Третьякова