Быйыл от ыйын 7-13 күннэригэр Таатта улууһугар, XXII төгүлүн ыытыллар «Манчаары оонньуулара-2025» спартакиадаҕа улууспут хамаандатын састааба сүүмэрдээһини ааһар, кыттарга бэлэмнэнэр.
Манна биһиги уопсастыбаннай кэрэспэдьиэммит, ох саанан ытыы хамаандатын тириэньэрэ Максим Кудрин бу курдук иһитиннэрии биэрдэ: «Ох саанан ытыы көрүҥэр, 13 киһи (кэрэ аҥардар, эр дьон — саастарынан арахсан) кыттыыта бигэргэннэ.
Охчуттар, хамаандабытын түмэр-салайар Егор Кудрин дьаһалынан, «Юность» стадиоҥҥа күҥҥэ иккитэ бэлэмнэнэбит. Түгэнинэн туһанан Орто Халыма улууһун дьаһалтатыгар, бэлэмнэнэрбитигэр 2 ох саа, 30 оноҕос ылан күүс-өйөбүл буолбутугар барҕа махталбытын биллэрэбит. Бэс ыйын 8 күнүттэн сүүмэрдээһин күрэхтэрэ ыытыллыахтара, 9-тан күрэхтэр саҕаланыахтара.
Маны сэргэ быйылгы «Дыгын оонньууларыгар» Алексей Созонов иккис төгүлүн кыттаары бэлэмнэнэр. Алексей ааспыт сылга бу күрэххэ, кытта үөрүйэх, уопуттаах спортсменнары куоһаран, 12 мадьыныттан 7 миэстэ буолбута.
Ааптар: Саргылана Кокорина