Бүгүн, ахсынньы 11 күнүгэр Е.М.Слепцов аатынан «Родина» успуорт уораҕайыгар оҕолорго «ДЮСШ Кубога- 2024» хапсаҕай күрэҕэ ыытылынна. Быйылгы үөрэх дьылын бастакы турнирыгар уопсайа 61 бөҕөс, 22 киилэттэн 65-тэн үөһээ ыйааһыҥҥа диэри кытыннылар.
Куоракка ыаллыы сытар Байды нэһилиэгиттэн кыттыбыт 10 оҕоттон 5 бөҕөс мэтээли (үс кыһыл, икки боруонса) кэтэн дьиэлээтэ. Судьуйа хамыыһыйатыгар, «Боотур» оҕо спортивнай оскуолатын тириэньэрэ Семен Ефимов, Н.И.Шарин аатынан Орто Халыматааҕы орто оскуола физкультураҕа учуутала Сарыал Корякин уонна Налимскай орто оскуолатын физкультураҕа учуутала уонна тириэньэр Евгений Слепцов үлэлээтилэр.
Күрэх чөмпүйүөннэр уонна призердар парадтарынан уонна хаартыскаҕа түһүүлэринэн түмүктэннэ. Бу курдук сотору кэминэн улуус таһымнаах хапсаҕай уонна көҥүл тустуу турнирдара былаан быһыытынан ыытыллыахтара. Бу успуорт көрүҥнэрэ уол оҕо этэ-хаана, өйө-санаата сайдарыгар биир бастыҥынан биллэр. Тустуук бөҕөстөрүнэн аатырбыт улууспутугар саҥаттан саҥа ааттар, бастыҥтан бастыҥ спортсменнар үүнэн-тахсан истиннэр!
Түгэнинэн туһанан, «Боотур» оҕо успуордун оскуолатын иитиллээччитин Слава Лаптевы, бу күннэргэ Нам улууһугар ыытыллыбыт өрөспүүбүлүкэтээҕи СССР норуоттар икки ардыларынааҕы кылаастаах успуорт маастара Иннокентий Николаевич Зырянов аатынан көҥүл тустуу турнирыгар чөмпүйүөн аатын ылбытынан, итиэннэ Саха Өрөспүүбүлүкэтин сүүмэрдэммит хамаандатыгар киирбитинэн эҕэрдэлиибит! Орто Халыма улууһа, успуорт киэҥ көбүөрүгэр өссө биир чулуу спортсменнаммыппытынан үөрэбит, киэн туттабыт!
Ааптар: Саргылана Кокорина