Тохсунньу 5-6 күннэригэр Өлөөкө-Күөл бөһүөлэгин тэрилтэлэрин, түмсүүлэрин икки ардыгар волейболга күрэхтэһии буолла. Манна кэрэ аҥардарга 5, эр дьоҥҥо 4 хамаанда күөн көрүстүлэр.
Оскуола оҕолоруттан саҕалаан, араас тэрилтэлэртэн сүүмэрдэммит хамаандалар илин-кэлин түсүһэн, ыһыылаах — хаһыылаах, тыҥааһыннаах да киирсиилэр аастылар.
Түмүккэ икки бөлөххө иккиэннэригэр устудьуоннар хамаандалара кыайан үөрүү өрөгөйүн биллилэр, көһө сылдьар кубогы туттулар. Олохтоох салалта аатыттан бары миэстэлэспит хамаандалар оонньооччуларыгар «Уйгу» маҕаһыынтан 1000, 700, 500 солк. сертификаттар туттарылыннылар.
Маны таһынан, анал ааттар ааттаннылар. Ол курдук, «Бастыҥ туруорааччы» Созонова Арина, Кудрин Николай, «Бастыҥ быһааччы» Третьякова Анжелика, Созонов Эрхан, «Бастыҥ көмүскээччи» Винокурова Арина, Винокуров Алексей буоллулар. Оттон «Бастыҥ оонньооччу» үрдүк ааты Ноговицына Айсулу, Винокуров Арсен ыллылар. Бары анал ааттаахтарга харчынан бириэмийэ, добун сурук туттарылынна. Спорт түһүлгэтин саҥа үүммүт сылга бастакы күрэхтэһиитэ бары кыттааччыларга өссө да үрдүк ситиһиилэри аҕаллын, чөл олоххо сирдээтин.
Ааптар: Изабелла Ноговицына Өлөөкө-Күөл б.