Улуустааҕы үөрэх управлениетын салалтата иһитиннэрэринэн, быйыл оҕо сайыҥҥы сынньалаҥ лааҕырыгар 395 оҕо хабыллыахтаах.
Уопсайа 13 лааҕыр үлэлиирэ былааннанар. Мантан Хатыҥнаахха уонна Ойуһардаахха оҕо сынньанар итиэннэ үлэлиир лааҕырдара арыллыахтаахтар.
Бэс ыйын 4 күнүттэн Орто Халыма куоратыгар И.В.Волков аатынан улуустааҕы гимназия уонна «Спектр» оҕо дьоҕура сайдар киин уонна «Боотур» оҕо спортивнай лааҕырдара үлэлэрин саҕалаатылар. Бу күннэргэ лааҕыр иитиллээччилэрэ ууттан, уоттан, баһаартан сэрэхтээх буолуу инструкцияларын, үөрэхтээһиннэрин ааһаллар. Быйылгы лааҕырдар үксүлэрэ дойдуга бэриниилээх буолууга, кыраайы үөрэтиигэ уонна эти-хааны чэбдигирдиигэ туһаайыллаллар. Дьарыктаах буолуу Орто Халыматааҕы киинин салалтата, быйыл 44 оҕо сайыҥҥы өттүгэр дьарыктаах буоларыгар үп көрүллэн былааннанан турарын туһунан иһитиннэрдэ. Ол курдук үлэһит оҕоҕо, дьарыктаах буолуу кииниттэн 7296 солк. көмө үп бэриллиэҕэ. Сокуон хараҕынан, 14-15 саастаах оҕоҕо — 4 чаас, 15-16 — 5ч., 16-18 саастаах ыччакка 7 үлэ чааһа көрүллэр.
Ааптар: Саргылана Кокорина