Балаҕан ыйын 1 күнүгэр В.А. Местников аатынан Алаһыай уопсай үөрэхтээһин орто оскуолатыгар Билии күнүн бырааһынньыга үөрүүлээх быһыыга-майгыга ыытылынна.
Быйыл аан маҥнай оскуола боруогар 11 оҕо (2 уол, 9 кыыс) үктэннэ.
Кылаас салайааччыта Саха Өрөспүүбүлүкэтин үөрэҕириитин туйгуна, алын кылаас үрдүк категориялаах учуутал Мотрена Николаевна Колесова үөрэнээччилэригэр маҥнайгы уруоктарын ыытта.
Нэһилиэк баһылыга Николай Николаевич Кондаков төрөппүттэри, үөрэнээччилэри эҕэрдэлээн туран, маҥнайгы кылаас үөрэнээччилэригэр рюкзагы кытта үөрэххэ аналлаах тээбириннэри олохтоох дьаһалта аатыттан бэлэх уунна.
Бу үөрэх сылыгар В.А.Местников аатынан Алаһыай уопсай үөрэхтээһин орто оскуолатыгар (дир.Н.М.Кондакова) 54 оҕо үөрэниэҕэ.
Бары учууталлары, үөрэнээччилэри үөрэх сыла саҕаламмытынан эҕэрдэлиибит! Баҕарабыт үлэҕитигэр, үөрэххитигэр үрдүк ситиһиилэри.
Саҥа үөрэх сыла үйэлээҕи тэниттин, сайдыыга сирдээтин!
Ааптар: Евдокия Кондакова