От ыйын 18 күнүгэр Хатыҥнаах орто оскуолатын үөрэнээччилэрэ Татаринова Анита (9 кыл.), Сибиряков Айаал (9 кыл.), Сергей Семенов (11 кыл.), Айсен Ефимов (11 кыл.) Хатыҥнаахтан Орто Халыма куоратыгар диэри уу аалынан айаннаан кэллилэр.
Кинилэри Хатыҥнаах нэһилиэгин баһылыга, биолог И.С. Белоногов уонна Хатыҥнаах орто оскуолатын дириэктэрэ А.С. Лаптева сирдээн, салайан аҕаллылар. Бу улууска бастакынан тэриллибит бырайыак, сонун сүүрээн буолар.
Оҕолор айаннарын туһунан биһиги эрэдээксийэбитигэр өрө көтөҕүүлээхтик сэһэргээтилэр. Бу сырыыларын туһунан, кэтээн көрүүлэрин, бэлиэтээһиннэрин ырытан суруйуохтара, научнай-практическай кэмпириэнсийэлэргэ кыттыахтара.
Иван Семенович: «Өбүгэ суолун тэлэн «По тропам предков» бырайыакпыт быйыл Хатыҥнаах нэһилиэгэ төрүттэммитэ 85 сылыгар ананар. Оҕолор бу сырыыларынан, өбүгэлэрбит хайдах-ханан сылдьыбыттарын, бултаан-алтаан, олохсуйан олорбут сирдэрин, суолларын көрдүлэр-үөрэттилэр.
Маннык хайысхалаах үлэ инникитигэр улууска «Туризм» да быһыытынан сайдыан баҕарабыт. Оҕолор олус астына-дуоһуйа сырыттылар, сылайбатылар. Куорат аннынан эрэ, арыый долгуннаах миэстэлэргэ түбэстибит. Барыта былаан быһыытынан табылынна.
Биллэрин курдук, оҕолор бэйэлэрэ уонна төрөппүттэрэ сэрэхтээх буолуу быраабылатын билсэн, илии баттаан, эппиэтинэстээхтик сыһыаннаһан, болҕомтолоохтук сырыттылар. Аара суолга тайаҕы, табаны, кыра кыыллары, көтөрдөрү, үүнээйилэри көрдүбүт. Тыатааҕы суола эрэ көһүннэ. Учаастактарынан сылдьан элбэҕи биллилэр, чинчийдилэр.
Хатыҥнаахтан уунан 250 кэриҥэ килэмиэтири ааһан, куорат территориятыгар 6-с хонукпутугар үктэннибит. Оҕолор сырыыларын туһунан сиһилии суруйуохтара, сырдатыахтара, научнай үлэлэргэ кыттыахтара», — диэн иһитиннэрдэ.
Хатыҥнаахтар билиини кэҥэтэр соруктаах айаннара улууска Туризм хайысхата сайдарыгар олук буоллун! Хорсун сырыылаах ыччаппытынан киэн туттабыт, үлэлэрин, арыйыыларын салҕыы сайыннаран, төрөөбүт нэһилиэктэрин, улуустарын киэҥ далайга ааттата туралларыгар баҕарабыт.
Ааптар: Саргылана Кокорина