Хас биирдии үөрэх кыһата, төрөппүт, оҕо сайыҥҥы бириэмэтин туһалаахтык атаарарыгар кыһаллар.
Быйыл Орто Халыма куоратыгар уонна хас биирдии нэһилиэгэр лааҕырдар үлэлээн араас таһымнаах соруктарын толордулар.
Сиэн Күөл нэһилиэгэр, Ойуһардаахха оҕо лааҕыра үс хайысханан үлэлээтэ.
От ыйын 27 күнүгэр спортивнай лааҕырдарын үлэтэ түмүктэннэ. Манна 15 тустуу куруһуогун иитиллээччитэ сырытта. Бу лааҕырга оҕолор эттэрин- сииннэрин бөҕөргөтөн, араас күрэхтэргэ кыттан, мас тардыһан, хапсаҕайдаан, дуобаттаан, футболлаан уо.д.а.күүстэрин- уохтарын тургутан бэрт сэргэх сайыны атаардылар. Лааҕыр, С.Н.Горохов аатынан Ойуһардаахтааҕы орто оскуола ОБЖ учууталын, РФ уопсай үөрэхтээһинин бочуоттаах үлэһитин, СӨ үөрэхтээһинин туйгунун, тустуу куруһуогун тириэньэрин
Петр Егорович Шкулев салайыытынан үлэлээтэ.
Бу курдук, кылгас сайыҥҥы күннэргэ оҕо дьиэ иһигэр төлөпүөҥҥэ бүкпэккэ, салгыҥҥа сылдьан, иҥэмтиэлээх аһылык аһаан, этин-хаанын эрчийэн, күнү кытта тэҥҥэ сүүрэн-көтөн сырыттаҕына, доруобуйата чэбдик буола улаатар.
Сөптөөх иитии сатабылыгар Ойуһардаах оскуолата холобур буолар.
