Атырдьах ыйын 21 күнүгэр Ил Дархан Айсен Сергеевич Николаев биир ньыгыл хамаандатынаан Орто Халыма улууһугар үлэлээтэ.
Сырыытын былаанынан Байды нэһилиэгэр «Кэскил» оҕо сайдар киинин уонна быраас амбулаториятын эбийиэктэрин үөрүүлээх быһыыга-майгыга арыйда. Онон Налимскайдар Ил Дарханныын көрсөн, эт куолаһын истэн, икки сүрүн тыын боппуруостара быһаарыллан, үөрэн-сэргэхсийэн, инникигэ эрэллэрэ күүһүрэн олороллор. Маны сэргэ Айсен Сергеевич Байды нэһилиэгиттэн анал байыаннай дьайыыга кытта барбыт байыастар дьиэ кэргэттэрин кытта көрүстэ.
Салҕыы Айсен Николаев Орто Халыма куоратыгар тутуута түмүктэммит атыы-логистическай киин эбийиэгэр сырытта. Ас-үөл, бородуукта хараллар миэстэтин көрдө, тустаах тэрилтэ инники былааннарын кытта билистэ. Халыма өрүс кытылыгар баар куораттааҕы пирскэ баран, уунан тиэйэн аҕалар «Фрейр» тырааныспар үлэтин усулуобуйатын, бэрээдэгин туһунан сэһэргэстэ.
«Үөрэхтээһин тэрилтэлэрин саҥатытыы» федеральнай бырагыраама чэрчитинэн хапытаалынай өрөмүөн ыытыллыбыт Н.И.Шарин аатынан Орто Халыматааҕы орто оскуолатыгар үлэ түмүгүн көрөн, өрөмүөн үрдүк таһымнаахтык ыытыллыбытынан сыаналаата, оскуола үлэһиттэрин, учууталлары, үөрэнээччилэри кытта көрсөн, ситиһиилээх үөрэҕи баҕарда, кэнчээри ыччат сайдыыта инники олохпут тутула буоларын бэлиэтээтэ.
Онтон С.И.Мицкевич аатынан Орто Халыматааҕы кииннэммит балыыһаҕа КТ (компьютернай томограф) кэбиниэтин көрдө-иһиттэ. КТ үлэтин салайар исписэлиис быраас Оксана Олесованы кытта үлэ барылын тула сэһэргэстэ, итиэннэ өрөспүүбүлүкэтээҕи балыыһаттан үлэлии кэлэ сылдьар мобильнай биригээдэ үлэтин хаамыытын кытта билистэ.
Айсен Сергеевич салҕыы «Хаарбах туруктаах дьиэттэн дьону көһөрүү» бырагыраама иитинэн оҥоһуллар элбэх кыбартыыралаах дьиэлэр тутууларыгар сырытта, Орто Халыма куорат баһылыгын Николай Чукровы кытта кэпсэтэн, тустаах бырагыраамаларынан тирэҕирэн үлэ тэтимнээхтик ыытылларын биллэрдэ.
Ил Дархан биир сүрүн сыалынан, улууска тыа хаһаайыстыбатын сайдыытын боппуруостарыгар мунньах ыытта.
Ил Дархан үлэтин сырыыта, Орто Халыма киин болуоссатыгар «Сайдыы Fest» эдэр ыччат, «Колымстудотряд» устудьуоннар этэрээттэрин, аҕыйах ахсааннаах норуоттар дэлэгээссийэлэрин, куорат нэһилиэнньэтин кытта көрсүүтүнэн түмүктэннэ.
Өрөспүүбүлүкэбит Ил Дархана кылгас бириэмэҕэ кэлэн, олохпутун-дьаһахпытын кытта билсэн, нэһилиэнньэни кытта көрсөн барбыта, барыбытыгар умнуллубат үтүө түгэнинэн буолла. Кини үлэтин сырыытынан элбэх боппуруос болҕомтоҕо ылыллан, улууспут сайдыытыгар төһүү күүс буолуоҕа диэн Өрөспүүбүлүкэбит аҕа баһылыгар эрэлбит улаатта.
Ааптар: Саргылана Кокорина