Олунньу 15 күнүгэр Өлөөкө Күөл орто оскуолатыгар улуустааҕы IX «Винокуровскай ааҕыылар» буолан аастылар.
Бу НПК биһиги оскуолабыт бочуоттаах выпускнига, тыа хаһаайыстыбатын наукатын доктора, профессор, Аан дойдутааҕы Хотугу форум академиятын уонна аграрнай үөрэхтээһин Аан дойдутааҕы академиятын академига, РФ суруналыыстарын сойууһун чилиэнэ, Российскай Академия үөрэхтээһинин уонна наукатын үтүөлээх үлэһитэ, СӨ Тыатын хаһаайыстыбатын үтүөлээх үлэһитэ, Орто Халыма улууһун бочуоттаах гражданина Иван Николаевич Винокуров сырдык аатыгар ананар.
Ыаллыы сытар Сыбаатай орто оскуолатыттан 8 оҕону саха тылын учуутала М.В.Колесова уонна оскуола психолога В.И.Винокурова аҕалан кытыннардылар.
Хомойуох иһин, атын оскуолалар араас биричиинэнэн кыттыбатылар.
Ол да буоллар, тэрээһин былаан быһыытынан барда.
Чинчийэр үлэлээх 24 оҕо биэс хайысханан арахсан үлэлэрин көмүскээтилэр.
Күн иккис аҥарыгар агроскилстарга күрэхтэстилэр.
Ол курдук, кус үргээн эттээһиҥҥэ, тоҥ балыгы хатырыктаан индигирка салааты оҥорууга, күөрчэх ытыйыыга, кылтан «Төбө быатын» оҥорууга кыргыттар, оттон куобах сүлүүгэ, илим хотоҕоһун оҥорууга, туһаҕы оҥорууга, тоҥ балыгы хатырыктаан кыһыыга уолаттар илин-кэлин түһүстүлэр.
Бэлиэ күммүт түмүктэрин истэн баран, тапталлаахтар күннэригэр аналлаах кафелаах дискотеканы 9-с кылаастар тэрийдилэр.
Былааннаммыт тэрээһиммитигэр кэлэн барбыт ыалдьыттарбытыгар истиҥник махтанабыт.
Ааптар: Изабелла Ноговицына
