Г.Г.Софронов аатынан Өлөөкө-Күөллээҕи орто оскуолаҕа сылын аайы ыытыллар «Винокуровскай ааҕыылар» быйыл онус төгүлүн ыытылыынна.
Манна Орто Халыма, Хатыҥнаах, Алаһыай орто оскуолаларыттан кэлэн кытыннылар. Хомойуох иһин, саамай чугас сытар Сыбаатай, Эбээх орто оскуолалара сыттана сытан, суол баарын үрдүнэн кэлбэтилэр. Ааҕыыларбыт биир күннээх да буоллар, олус интэриэһинэйдик аастылар. Ол курдук, сарсыардаттан тэрээһин үөрүүлээх аһыллыытыгар И.Н.Винокуров бииргэ төрөөбүт быраата Винокуров А.Н. кэлэн эҕэрдэ тыл эттэ. Антон Николаевич оҕолорго дойдугутугар туһалаах, наадалаах дьон буоларга кыһаллыҥ диэн сөптөөх сүбэтин, тустаах санаатын эттэ.
Салгыы үс хайысханан арахсан эдэр чинчийээччилэр үлэлэрин көмүскээтилэр. Дьүүллүүр сүбэҕэ оскуолабыт учууталлара олорон, дакылааттары иһиттилэр, сыаналаатылар. Хайысха аайы кыра, улахан бөлөхтөргө араартаан лауреаттары, дипломаннары быһаардылар.
Минньигэс астаах остолобуойбутугар мааны астаах эбиэт кэннэ, агроскилстар саҕаланнылар. Сэттэ араас агроскилска уопсайа 25 оҕо кытынна. Манна күөрчэх ытыйыы, хаан алаадьыны астааһын, кус үргээн эттээһин, тоҥ балыгы хатырыктаан кыһыы, индигирка салааты оҥоруу, балыктан суши астааһын уонна ситии хатыытын сатабылларын көрдөрдүлэр. Кылаастарынан тарҕаһан күрэхтэһиигэ түһүнэн кэбиспит оҕолорбутун кэрийэ сылдьан көрдүбүт, минньигэс алаадьы, тоҥ балык сытыттан иҥсэбит көбөн, амсайар кэми кэтэстибит.
КиэҺээҥи чэй кэннэ ааҕыылары түмүктүүр түгэҥҥэ кыайыылаахтарга добун суруктар, кыттааччыларга, салайааччыларга туоһу суруктар туттарылыннылар. Салайан кэлбит Хатыҥнаах орто оскуолатын технология учуутала Кудрина Е.А. уонна Алаһыай орто оскуолатын учуутала Никулина В.И. махтал суруктары кытта өйдөбүнньүк бэлиэлэри ыллылар. Иван Николаевич оҕолоро анаабыт харчынан бириэмийэлэрин кус үргээһинигэр уонна ситии хатыытыгар кыттыбыттар, кыайыылаахтар ыллылар. Агрохайысхаҕа уонна сылгыга сыһыаннаах чинчийэр үлэлээх үс оҕоҕо И.Н.Винокуров аймахтара Третьякова М.Ю. уонна Винокуров И.Н. эмиэ харчынан бириэмийэлэрин анаатылар.
Дьоро күммүт тапталлаахтар күннэригэр аналлаах үҥкүү киэһэтинэн, «Бастакы таптал» диэн кафенан түмүктэннэ. Оттон тустуук уолаттарбытын ыаллыы сытар Эбээх нэһилиэгэр ситиһиилээхтик кыттаарыҥ диэн алҕаан күрэхтэһиигэ атаардыбыт. Дьэ онон, биир күннээх тэрээһиммитигэр дакылаат да аахтыбыт, кус да үргээтибит, ситии да хаттыбыт…
Ааптар: Изабелла Ноговицына, Өлөөкө Күөлэ бөһ.