Березовка, Бастакы Мээтис, Байды нэһилиэктэригэр, улуус үрдүнэн турар кыһалҕалар этиллибиттэр, хамыыһыйа болҕомтотугар киирбиттэр.
Ол курдук суол-иис оҥоһуута, култуура отделын сөргүтүү, Олоҥхо ыһыаҕар бэлэмнэнии, быраас исписэлиис суоҕа (тиис бырааһа, биэлсэр), пуочтанан кэлэр баһыылка хаайтарыыта, АН-3 сөмөлүөт, МИ-8 көтөр ааллар төлөбүрдэригэр, айанньыт багааһын нуорматын улаатыннарыы, температуралара эппиэттээбэт үөрэх тэрилтэлэрэ, Аартыка улуустарыгар уматыкка чэпчэтии, тыа хаһаайыстыбатыгар, чуолаан ынах сүөһүнү харайыытыгар элбэх этинии, баҕа санаа нэһилиэнньэттэн киирбит.
Улуус баһылыга тус Телеграм ханаалыгар мунньахха уопсайа 532 киһи сылдьыбыт, ааспыт сылтан 79 киһинэн аҕыйах диэн бэлиэтээбит. Саамай элбэх Орто Халыма куоратын, Бастакы Мээтис уонна Бастакы Хаҥалас нэһилиэктэрин олохтоохторо кыттыбыттар.
Үөрүүлээх быһыыга-майгыга, олохтоохтор дохсун ытыстарын тыаһынан наҕараадаланнылар: Байды нэһилиэгэр «СӨ Бочуоттаах аҕам кырдьаҕаһа» бэлиэнэн өрөспүүбүлүкэ сайдыытыгар дириҥ кылааттарын иһин: Ангелина Алексеевна Кудрина, Акулина Прокопьевна Кудрина, Варвара Иннокентьевна Слепцова, Петр Николаевич Винокуров, Анна Николаевна Винокурова, Людмила Семеновна Колесова, Евдокия Александровна Шадрина. РФ Дьиэ кэргэн, СӨ оҕо саас, улууска Үөрэхтээһин сылларын чэрчитинэн, үөрэххэ, өрөспүүбүлүкэ таһымнаах тэрээһиннэргэ бастыҥ ситиһиилэрин, көхтөөх кыттыыларын иһин Лена, Сергей уонна Влад Третьяковтарга «Туйгун Дьиэ кэргэн» анал аат бэрилиннэ. Улуус аҕа баһылыгын Бочуотунай кырааматата, физкультура уонна успуорт сайдыытыгар кылаатын иһин, Налимскай орто осколатын физкультураҕа учууталыгар Евгений Алексеевич Слепцовка уонна нэһилиэк социальнай-экэнэмиичэскэй сайдыытыгар сүҥкэн кылаатын иһин, урбаанньыкка Сергей Васильевич Третьяковка туттарылынна. Бастакы Мээтис Улуус баһылыгын Бочуоттаах кыраамататынан, өр сыллаах үлэтин, социальнай-экэнэмиичэскэй сайдыыга кылаатын, уопсастыбаҕа көхтөөх кыттыытын иһин, олохтоох ОДьКХ массыныыһа Константин Гаврилович Третьяков, маннык суолталаах өҥөтүн иһин А.Н.Явловскай аатынан Сылгы Ыытардааҕы орто оскуола дириэктэрин э.т. Ирма Владимировна Лаптева, «Кэскил» түөлбэ салайааччыта, уопсастыбаҕа көхтөөх кыттыытын иһин Дарианна Алексеевна Третьякова наҕараадаланнылар. Березовка Березовка нэһилиэгэр, РФ Дьиэ кэргэн, СӨ Оҕо саас сылларын чэрчитинэн, «Кочевая семья — көс дьиэ кэргэн» улуустааҕы куонкурус анал аат хаһаайыттарыгар Павел Викторович Кунгурцевка уонна Анна Егоровна Щербаковаҕа туттарылынна. «Элбэх оҕолоох дьиэ кэргэн» номинация дьупулуомунан Егор Егорович уонна Иванна Васильевна Балаганчик дьиэ кэргэттэрэ наҕараадаланнылар. Нэһилиэк социальнай-экэнэмиичэскэй, атыы-эргиэн сайдыытыгар кылааттарын иһин улуус баһылыгын Бочуоттаах кырааматата, урбаанньыкка Юлия Евгеньевна Пантелееваҕа, уһун сыллаах үтүө үлэтин иһин олохтоох ОдьКХ маастарыгар Юрий Александрович Степановка туттарылынна. Улуус дьаһалтатын Махтал суруга, уопсастыбаннай олох бэрээдэгин көрүү иһин ДНД «Хонтуруол» салайааччытыгар Василий Васильевич Хабаровскайга, олоххо үлэҕэ көхтөөх кыттыытын иһин ДЭС силиэсэригэр Антон Павлович Щербаков ананна.
Биһиги улууспутугар, Саха Өрөспүүбүлүкэтин Бырабыыталыстыбатын мунньаҕа олунньу 18-22 күнүгэр ыытыллара былааннанар. Бырабыыталыстыба мунньаҕын хамыыһыйата икки бөлөҕүнэн үлэлиэҕэ. Бэрэссэдээтэлинэн СӨ Тутууга миниистэрэ Виктор Дмитриевич Романов салайыаҕа.
Ааптар: Саргылана Кокорина
Хаартыска: Баһылык тус Телеграм ханаалыттан