Улуу Кыайыы 80 сылын көрсө, 2025 сыл ыам ыйын 4 күнүгэр Ойуһардаах сэлиэнньэтигэр үгэскэ кубулуйбут, хоту дойду дьонун тутаах көлөтүгэр «Буран» снегоходка, уһун, кылгас моделларга арааран күрэх буолан ааста.
Арҕаа Эбэбит күнүс 15 чаастан, былаахтарынан киэргэнэн, музыка ньиргийэн син балайда көрөөччүлээх тэрээһин ыытылынна.
Быйылгы күрэх уратыта диэн икки түһүмэхтээх буолла, ол курдук: Бастакы түһүмэххэ билиҥҥи кэмҥэ киэҥник биллибит «корнхолл» күрэҕэр 12 кыттааччы эр бэртэрэ, кыраҕы харахтаахтарын, кытаанах илиилээхтэрин көрдөрдүлэр, иккис түһүмэххэ 50 миэтирэ сири тоҥуу хаарынан сүүрэн кэлэн, мууска «ыһылла» сытар таҥастарын (куртка, бэргэһэ, үтүлүк) булан, бэрт сымсатык кэтэн, стартыыр сиргэ кэтэһэн турар тимир көлөлөрүгэр сүүрэн тиийэн күөлү эргиччи ыстаннардылар.
Көрөөччүлэр, ыалдьааччылар бары өрө көтөҕүллэн ким хаһыс миэстэ айаннаан иһэрин, ыытааччы сынньалаҥ киин уус-уран салайааччытын Егор Макаровы кытта кыраҕатык кэтии, «ыалдьан» хаһыытыы турдулар.
Түмүккэ: Уһун базалаахтарга 1 миэстэҕэ ыалдьыппыт Арҕахтаах бэртээҕэ Юриан Винокуров таҕыста, иккиһинэн тилэх баттаһа Николай Оконешников уонна үсүһүнэн Максим Винокуров таҕыстылар.
Икки «Буран» аара суолга умуллан хааланнар финишкэ кэлбэтилэр. Кылгас базалаах техникэлэргэ бастакы миэстэни икки түһүмэх түмүгүнэн Анатолий Бандеров бастаата, иккис миэстэҕэ Петр Винокуров, үһүс миэстэ Григорий Оконешников буоллулар.
Бу да сырыыга икки техника умуллан хааланнар уолаттар Виталий Горохов, Прокопий Лаптев хардары таары көмөлөсүһэн биэтэккэ бүтэһик да кэллэллэр көрөн турар дьон хайҕабылларын ылыахтарын ыллылар.
Ааптар: Пантелеймон Винокуров
Хаартыска: Евдокия Винокуровa