Хатыҥнаах, улууспутугар саамай дьоҕус, ол эрэн ураты кэрэ айылҕалаах, талааннаах, түмсүүлээх дьонноох-сэргэлээх нэһилиэгинэн буолар. Бу күн бөһүөлэккэ 128 киһи олохсуйан олорор. Хатыҥнаахбыйыл дириҥ суолталаах ситиһиитинэн, нэһилиэк гиэрбэтин бигэргэниитэ буолар. Гиэрбэ көстүүтэ Мария Афанасьевна Кудрина-II ааптарыскай эскииһинэн олохтонно. «Алгыс» култуура киинигэр Ф.И.Роббек аата иҥэрилиннэ.
Хатыҥнаахтар Үлэ сылын чэрчитинэн элбэх далааһыннаах үгүс үлэ ыыталлар. «Бу сайын 25 субуотунньук ыытылынна», — диэн нэһилиэк баһылыга Иван Белоногов олох-дьаһах туһунан иһитиннэриитин саҕалаата.
Норуот күүһэ-көмүөл күүһэ
Бөһүөлэк нэһилиэнньэ көҕүлээһининэн тупсар, сайдар. Ол курдук ыһыах ыытыллар түһүлгэтэ дэхсилэнэр, эр дьон түмсүүтүнэн Арчы дьиэтин маһа бэлэмнэннэ, от ходуһаларын бүөлүүр буойуулар тутулуннулар, уулуссаларга тротуардар туруорулуннулар. Дьахтар түмсүүтүн көмөтүнэн искибиэрдэргэ тупсарыы, саҥардыы үлэлэрэ ыытылыннылар. Күөл кытылынан даамба оҥоһулунна.
Ойуур баһаарыттан сэрэхтээх буолуу ирдэбилинэн минерализованнай балаһа саҥардыллан оҥоһуллубута.
Олохтоох нэһилиэнньэ көҕүлээһинин өйүүр бырагыраама чэрчитинэн, сайыҥҥы өттүгэр дьону ыраас уунан хааччыйар турбалар тардыллыбыттара. Ааспыт сылга бырагыраама чэрчитинэн ылбыт тиэхиньикэбит субуотунньуктарга, нэһилиэнньэ олоҕор, тупсарыы үлэтигэр күүс-көмө буолар. Быйыл успуорт былаһаакката оҥоһуллан үөрүүлээх быһыыга- майгыга арылынна.
Тыа хаһаайыстыбата
Хаһаайыстыбалаах дьоҥҥо 112 ынах сүөһү (39 ыанньык), 51 сылгы сүөһү (14 биэ), 80 куурусса, 2 сибиинньэ иитиллэр. Социальнай хантыраак чэрчитинэн икки киһи сылгы сүөһү иитэ ылла.
Бу күн туругунан 208 туонна от оттонон, нэһилиэк былаана — 87% тэҥнэстэ.
Кыстыгы бэлэм көрсөргө бары кыах ууруллар
Социальнай эбийиэктэр кыстыкка бэлэмнэнэллэр. Ол курдук ОДьКХ, ДЭС эбийиэктэригэр былааннаах өрөмүөннэр ыытыллаллар. Нэһилиэнньэ 99% ититэр ситимҥэ холбонон олорор. Бөһүөлэктэн тэйиэс олорор биир дьиэ холбоно илик. Дьиэлээхтэргэ оттук маһынан көмө оҥоһуллар.
Ким да умнуллубат, туох да умнуллубат!
Байыаннай дьайыыга кытта сылдьар уолаттарга уонна кинилэр дьиэ кэргэттэригэр тустаах көмө оҥоһуллар. Ол курдук 5 дьааһыкка тоҥоруллубут ас, маскировачнай сиэккэ оҥоһуллан ыытыллыбыттара. Анал байыаннай эпэрээсийэҕэ кытта сылдьан дойдутун туһугар олоҕун олук уурбут дьоруойбут Николай Сибиряковка аналлаах «За мир, за Победу!» искибиэр уонна истиэндэ туруоруллубута. Саллааппыт үрдүк аатыгар бу саас улуустааҕы байыаннай патриотическай ыччат форумун уонна Киберспорт күрэҕин ыыппыппыт.
Үөрэхтээһин
Сайыҥҥы өттүгэр оскуола үөрэнээччилэригэр аналлаах икки лааҕыр үлэлээтэ. Ол курдук алын кылаас оҕолоро доруобуйаларын чэбдигиртилэр, улахан кылаас оҕолоро оскуола 6 ынах сүөһүтэ кыстыыр отун бэлэмнээтилэр. Быйыл оскуоланы бүтэрбит выпускниктарбыт, Кэрэчээнэ Кириллина ХИФУ-ка физкультура учууталыгар, Антон Лаптев медколледжка үөрэнэ киирдилэр. Бу сыл оскуолаҕа аныгы технология института 16 ноутбук уонна 2 ноутбук анаабыта. Оҕолор Дьокуускай куоракка «Сосновый бор» уонна «Энергетик» лааҕырдарга сынньаннылар. Быйыл оскуолаҕа 5 оҕо киириэҕэ.
«Чэчир» оҕо уһуйааныгар 16 иитиллээччини 3 иитээччи көрөр-истэр. Уһуйаан иитээччилэрэ араас таһымнаах куонкурустарга кыттан бастыҥнар истэригэр киирэллэр. Бу сайын бэйэ бүддьүөтүттэн, үлэһит күүһүнэн уһуйаан эбийиэгин муостатыгар ититии үлэтэ ыытылынна, кырыыһата уонна кирилиэһэ оҥоһулунна.
Биир дойдулаахтарбыт ситиһиилэрэ
Биир дойдулаахпыт Максим Кудрин бу сылга геологическай билим хандьыдаата буолары ситистэ. Маны сэргэ кини Федор Роббек айымньыларынан «Кубалар» ырыанньыгы оҥорторон таһаарбыта. Хатыҥнаахтар бильярд күрэҕэр, мас тардыһыытыгар чаҕылхай көрдөрүүлээхтэр. Маны сэргэ талааннаах ыччат Андреана Антипина «Туундара туллуктара» Гран-при үрдүк аатын ылбыта, Ньургун Третьяков «Халыма Боотура» күрэххэ ситиһиилээхтик кыттыбыта.
Ааптар: Саргылана Кокорина