Мин элбэхтэ суруллубут килиэп туһунан тиэмэни эмиэ суруйан эрэбин… Киһи остуолугар баар буолуохтаах аспыт сороҕор атыыга суох буолар. Сарсыарда маҕаһыыннарга аҕалбыт килиэптэрэ, эбиэт иннинэ бүтэн хаалар. Килиэптэн маппыт киһи, куорат устун көрдүү барар.
Били урут куораты аһата олорбут пищекомбинат тэрилтэ ыһыллан-тоҕуллан дьылҕата умнууга хаалла быһылаах. Биир да салайааччы, саатар хаһыат нөҥүө суруйбаттар, хаарыан икки этээстээх эбийиэк, туохха да наадата суох курдук турар.
Саас, сайын оҕолор бу эбийиэккэ мэниктиир ыһыылара-хаһыылара иһиллээччи. Үксүлэрэ табаҕы оборбутунан сылдьаллара кимиэхэ да сонун буолбатах, онон бырах дьиэҕэ мусталлара биир өттүнэн сэрэхтээх, кутталлаах. Ааспыт ыйга диэри, урбаанньыт Наталья Васильевна Винокурова урукку бэкээринэ курдук олус амтаннаах сиэрэй килиэби астыыр этэ, билигин кини үлэтэ тохтоон турар.
Биһиги улуус киин куората диэн ааттанар куорат, урукку курдук килиэби астыыр бэкээринэлээх буолуохтаах этибит. Олус куһаҕан, нэһилиэнньэ аҥара килиэбэ суох олороро. Урут бэл сэрии кэмигэр, төһө да нуорма буоллар, дьон килиэп баар буолан, нуормаларын ылан аһаан олорбуттар.
Дьокуускайтан кэлэр атыы килиэп, амтана араас, ардыгар килиэпкэ да маарыннаабат, сыаната да ботуччу — 200 солкуобай! Арай урбаанньыттар килиэби астыылларын тохтоттохторуна, хайдах олоруо этибитий? дии саныыбын… Куораппыт аҕа баһылыга килиэп астыыр урбаанньыттарга, үлэлэрин истиҥник сыаналыа этэ дии саныыбын.
Ааптар: Виталий Явловскай