СӨ Бырабыыталыстыбатын ситэриилээх былааһын отчуоттуур мунньаҕын бастакы бөлөҕө, олунньу 19-20 күннэригэр, Орто Халыма улууһун Иккис Мээтис, Иккис Хаҥалас, Бастакы Хаҥалас, Алаһыай нэһилиэгин олохтоохторун кытта көрүстэ. Бу түөрт нэһилиэккэ уопсайа 148 киһи сырытта. 23 олохтоох, кырата 3-4 боппуруос биэрдэ, санаатын этиннэ, биирдиилээн көрсөн тустаах боппуруостарын быһаарда.
СӨ тутууга миниистирэ Виктор Дмитриевич Романов уонна Орто Халыма улууһун баһылыга Иван Васильевич Лаптев салайбыт бастакы бөлөхтөрүгэр үлэлээтилэр: СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ, биир дойдулаахпыт Светлана Валентиновна Горюшинская, СӨ Доруобуйа харыстабылын министиэристибэтин стратегическай сайдыыга уонна информационнай технология отделын салайааччыта Евдокия Семеновна Игна- тьева, СӨ Тыа хаһаайыстыбатын оҥорон таһаарар бырамыысалыннаһын бэлиитикэтин министиэристибэтин отделын салайааччытын э.т. Дмитрий Анатольевич Филиппов, «Полярные авиалинии» авиахампаанньа былаанныыр-экэниэмийэлиир отделын сүрүннүүр исписэлииһэ, биир дойдулаахпыт Алексей Семенович Семенов, Орто Халыматааҕы кииннэммит балыыһа кылаабынай бырааһа Яков Романович Бережнев, СӨ «ОДьКХ» Орто Халыматааҕы филиалын начаалынньыга Александр Васильевич Третьяков, СӨ Айылҕа харыстабылын Орто Халыматааҕы иниспиэксийэтин судаарыстыбаннай иниспиэктэрэ Владислав Александрович Третьяков.
Орто Халыматааҕы кииннэммит балыыһа кылаабынай бырааһа, Орто Халыматааҕы ОДьКХ филиалын начаалынньыга үлэ миэстэлэригэр эбийиэктэр туруктарын көрдүлэр, тэрилтэ салайааччыларын, үлэһиттэри кытта көрүстүлэр. Д.А. Филиппов, сылгы Собуотун «Сарыал» пиэрмэ үлэһиттэрин кытта билсэн, саҥа хотон тутуллуохтаах миэстэтин көрдө-иһиттэ, салайар хайысхатынан кэккэ бэлиэтээһиннэри ылынна.
Мунньах сахалыы тылынан бэрт сэргэх Видеоролик быһыытынан саҕаланна, бөлөх салайааччыта Виктор Дмитриевич отчуоттан кылгас дакылааты билиһиннэрдэ.
Олохтоохтор долгутар боппуруостара үксэ, кэнники сылларга Бырабыыталыстыба иннигэр элбэхтэ хатыланар, быһаарыыга турар кыһалҕалар этилиннилэр. Ол курдук уматык үрдээһинэ, тыа хаһаайыстыбатын салаатыгар көмө субсидиялар, интэриниэт ситимэ, сорох нэһилиэккэ быраас-биэлсэр суоҕа, эминэн-томунан хааччыллыы, исписэлиистэргэ көмө өйөбүллэр, ыччат хоту улууска олохсуйарыгар көҕүлүүр бырагыраамалар, өртөөһүн боппуруоһа, олохтоох ОДьХХ тэрилтэлэр анал тиэхиньикэнэн хааччыллыылара, чэпчэтиилээх билиэти тарҕатыы систиэмэтэ уо.д.а. араас хабааннаах боппуруостар турдулар.
Үрдүкү салалта, сорох боппуруос муниципальнай салалта быһаарыытынан олоххо киирэрин бэлиэтээтэ. Холобур, биир сүрүн боппуруос — 6 нэһилиэги хабар «кольцевой» суол (Сыбаатай — Эбээх — Өлөөкө Күөлэ — Арҕахтаах — Ойуһардаах — Сылгы Ыытар) улуус салалтатын үбүлээһининэн «Аартыка суоллара» ХТ толоруутунан, Өлөөкө Күөлэ — Арҕахтаах суол оҥоһуллубут.
Сыбаатайдар оскуола тутуутун боппуруоһун быһааралларыгар туруорустулар. Эбээхтэр дизельнэй ыстаансыйаларын, быраас амбулаториятын тутуутун күүтэллэрин өссө төгүл тоһоҕолоон биллэрдилэр. Өлөөкө Күөлүгэр быйыл толору хааччыллыылаах ынах сүөһү иитиллэр комплекса тутуллара былааннанар. Олохтоохтор успуорт саалатын тутуутун күүтэллэрин эттилэр.
Арҕахтаахха, сир баайын, каадырабай бэлиитикэ, бэйэ бородууксуйатынан хааччыллыы, төрөппүт кэмитиэтин аатыттан саҥа оскуола хааччыллыыта толорду эппиэттээбэт диэн этинии киирдэ, быраас амбулаторията тутуллуутун күүтэллэрин эттилэр.
СӨ Бырабыыталыстыбатын отчуоттуур мунньаҕар кыттыбыт нэһилиэк олохтоохторо тыа сирин олоҕо тупсарын, олох сайдыытын, ыччат кэскилин туһугар долгутар кыһалҕаларын тула элбэҕи эттилэр, ыйыттылар. Ситэриилээх былаас отчуотун истэн, сорох дьон ыйыппыт боппуруоһугар хоруй ылан, элбэххэ эрэнэ тарҕаста. Өрөспүүбүлүкэ бырабыыталыстыбатын отчуоттуур дэлэгээссийэтин бэрэссэдээтэлэ Виктор Романов: «Боротокуолга баар боппуруостар сыыйыллыбаттар, кэми, бириэмэни эрэйэллэр, ол эрэн олоххо киириэхтэрэ, хас биирдии кыһалҕа дьүүллэнэн, кыах баарынан быһаарылла сатыаҕа туох барыта үбүлээһинтэн тутулуктаах. Билиҥҥи ыарахан, байыаннай балаһыанньаны, саансыйа кэмнэрин бары сомоҕо күүспүтүнэн туоруох», — диэн ыҥырда, кыттыыны ылбыт дьоҥҥо махтанна.
Түгэнинэн туһанан, СӨ Бырабыыталыстыбатын тустаах министиэристибэлэрин ааттарыттан Махтал сурук туттулар, Бастакы Хаҥалас нэһилиэгэр дьон дьарыктаах буолуутун хааччыйыы иһин Өлөөкө Күөллээҕи сылгы Собуотун дириэктэрэ К.Н.Винокуров, Тыа хаһаайыстыбатын сайдыытыгар сүҥкэн кылааттарын иһин Бастакы Мээтискэ В.Н.Винокуров, сылгы Собуотун сылгыһыта А.И.Радченко, үүт пиэрмэтин үлэһитэ Н.О.Созонов, үөрэхтээһин эйгэтигэр иитиигэ-үөрэтиигэ тус кылааттарын, үөрэнээччилэр ситиһиилэрин иһин Өлөөкө Күөллээҕи агрохайысхалаах орто оскуола учуутала В.В.Созонов, эбии үөрэхтээһин педагога Е.П.Тимофеева, олохтоох ОДьХХ үлэһитэ А.Б.Винокуров. Маны сэргэ Аҕа дойду көмүскээччи күнүн чэрчитинэн, Анал байыаннай дьайыы кыттыылаахтарын дьиэ кэргэттэригэр улуус салалтатын аатыттан сэмэй кэһии туттарылынна.
Ааптар: Саргылана Кокорина