Сылын аайы нэһилиэнньэ көҕүлээһинин өйүүр бырагыраама чэрчитинэн тыа сирин олоҕо-дьаһаҕа сайдар, онуоха олохтоох нэһилиэнньэ төһүү күүс буолар.
Бастакы Мээтис нэһилиэгэр тустаах бырагырааманан «Агромаш-90 ТГ» тимир типиликтээх (гусеничный) тыраахтар ылылынна.
Бырайыак уопсай суумата 6 468 000 солк. тэҥнэһэр.
Ол курдук судаарыстыба биэрэр 2 мөлүйүөнүгэр эбии, олохтоох дьаһалта бүддьүөтүттэн — 4 314 000, нэһилиэнньэ — 104 000, успуонсардар күүстэринэн 50 000 көмө оҥоһуллубут.
Бырайыак хамсааһынын туһунан Бастакы Мээтис нэһилиэгин баһылыга Владимир Колесов маннык кэпсиир: «Олохтоох нэһилиэнньэ көҕүлээһинин өйүүр бырагыраамаҕа быйыл олохтоохтор көхтөөхтүк кыттан, успуонсардар төһүү күүс буоланнар, бырагыраамабыт олоххо киирдэ.
Бу күннэргэ тыраахтары аукциоҥҥа кыайбыт тэрилтэ Дьокуускай куоракка аҕалла. Тиэхиньикэ баһаартан сэрэхтээх буолуу үлэтигэр туһуланыаҕа. Тиэхиньикэбит плугтаах ПКЛ-70, отваллаах, «УПРВД» диэн, противопожарнай ранецтаах.
Бу бырайыакпытын ылсарга сүбэ-ама, тирэх буолбуттарыгар, Орто Халыма улууһун дьаһалтатын «Отдел стратегического планирования» отделын исписэлиистэригэр, Иккис Хаҥалас нэһилиэгин баһылыгар Юрий Гуляевка уонна успуонсар- урбаанньыттарга А.А.Колесоваҕа, А.А.Дашевскайга, М.Н.Бандероваҕа, Н.В.Даниловка, И.И.Бекреневка улахан махталбытын тиэрдэбит. Маннык көхтөөх, өйөбүллээх дьонноох, нэһилиэнньэлээх буоламмыт биир тыын боппуруоспут быһаарылынна диэн үөрэбит, киэн туттабыт».
Ааптар: Саргылана Кокорина