Номнуо атырдьах ыйыгар үктэннибит. Оттооһун үлэтэ сүрүн тиэмпэтин аһарар кэм кэллэ. Үлэһит тыа дьоно бары күүһү окко уурар, бары кыаҕы тыа хаһаайыстыбатын сайдыытыгар аныыр.
Атырдьах ыйын 1 күнүн туругунан, улуус үрдүнэн 1842 от оттонон, былаан 33,8% тэҥнэстэ. Сылгы Собуотун биригээдэлэрэ 597 туонна ылан, былааннарын 38,6% тэҥнээтилэр. Бааһынай хаһаайыстыбалаах дьон былааннарын 40% толордулар. Нэһилиэнньэ күүһүнэн 914 туонна от оттонно. Ааспыт сыл баччаларга 2039 туонна от оттоммута бэлиэтэммит. Улуус үрдүнэн 62 тиэхиньикэ үлэлиир.
Ол курдук Сыбаатайдар 248 туонна (64%) оту оттоон, бырыһыанынан тэҥнээтэххэ, бастыҥ көрдөрүүлээх иһэллэр. Өлөөкө Күөлэ — 730т (60%), Хатыҥнаах — 91т (38%), Сылгы Ыытар — 132т (33%), Арҕахтаах — 124т (31,0%), Ойуһардаах — 266 (20%), Эбээх 190 (19%) Налимскай — 61т (12,2%) туонна ылбыттар.
От ыйын 28 күнүгэр, Бастакы Хаҥалас нэһилиэгэр өбүгэ саҕаттан үгэс буолан кэлбит «Күүлэй-2024» ыытылынна.
Быйылгы ходуһа бырааһынньыга, дьахтар күүһүнэн тэрилиннэ. Ол курдук 8 кэрэ аҥар: Е.Г.Лаптева, А.И.Винокурова, Н.С.Созонова, А.А.Татаринова, М.М.Винокурова, Т.С.Слепцова, А.А.Третьякова, М.И.Винокурова, охсуллубут оту илиинэн харбаан, субуулаан, куопуналаан илин-кэлин түһүстүлэр.
Күргүөмнээх үлэ түмүгүнэн, Г.Г.Софронов аатынан агрохайысхалаах орто оскуола кэлэктиибин эр дьонун күүһүнэн икки от кэбиһиллибитэ.
«Күүлэй-2024» бастыҥнарынан, I-кы миэстэ — Анна Ивановна Винокурова, IIм. —Евдокия Гавриловна Лаптева, III м. — Мария Ивановна Винокурова буоллулар.
Бастыҥ харбааччылар уонна «Аҕам саастаах кыттааччылар» анал аат кыайыылаахтара, игирэ эдьиийдии-балыстыы Александра уонна Акулина Андреевналар, сылгы Собуотун уонна олохтоох дьаһалта аатыттан сыаналаах бэлэхтэринэн, мэтээллэринэн наҕараадаланнылар.
Ааптар: Саргылана Кокорина