Өрөбүл күн «Сайдам» култуура киинигэр «Ойуһардаах кустуктара» оҕо үҥкүү ансаамбылын кыттыылаахтарынан «Москва — оҕо хараҕынан» ТОК-шоу тэрээһин буолан ааста.
Манна ансаамбыл оҕолоро нэһилиэк олохтоохторугар, төрөппүттэригэр, салайааччылара Егор Семенович Макаровы кытта Дойду тэбэр сүрэҕэр хайдах кыттыбыттарын кэпсээтилэр, ситиһиилэрин үллэһиннилэр.
Санатан эттэххэ, «Ойуһардаах кустуктара» С.Н.Горохов аатынан Ойуһардаах орто оскуолатын үөрэнээччилэринэн олохтоммут үҥкүү ансаамбыла Москуба куоракка, Таланты России бырайыак чэрчитинэн «Мир Ладони» Норуоттар икки ардыларынааҕы куонкурус-бэстибээлгэ кыттан, «Норуот үҥкүүтэ» номинацияҕа Гран-при хаһаайыттарынан буолбуттара.
Егор Макаров, ансаамбыл салайааччыта: «Ойуһардаах кустуктара» ансаамбылбыт ааспыт сылга төрүттэммитэ. 5-7 кылаастан 10 оҕо үҥкүүгэ дьарыктанар. Бастакы сырыыбытыгар ситиһиилээхтик кыттан, сэтинньи ыйга Санкт-Петербург куоракка ыҥырыы туттубут. Бырайыаспытын маҥнай төрөппүттэр бэйэлэрэ уйуммуттара. Билиэттэрбитин бигэргэттэхпитинэ СӨ Аартыка уонна хотугу норуоттар дьыалаларын министиэристибэтэ ороскуоппутун төннөрүөхтээх. Бэстибээлгэ «Эрэкэ-дьэрэкэ» уонна Чукотскай норуот үҥкүүлэрбитинэн кытынныбыт. Гран-при аатын ылан, сэтинньи ыйга Санкт-Петербург куоракка бэстибээлгэ кыттыыга ыҥырыы-сэртипикээт туттубут. Онон бырайыаспытын быһаарыннахпытына, кытта айанныыр былааннаахпыт».
Ааптар: Саргылана Кокорина