Кулун тутар 1 күнүгэр, Улуу Кыайыы 80 сылын көрсө «Кыайыы салюта» бэстибээл Гала-кэнсиэрэ буолан ааста. Тэрээһиҥҥэ 7 нэһилиэктэн уопсайа 304 киһи кыттыыны ылла.
Кэнсиэркэ талыллан киирбит бастыҥ нүөмэрдэргэ анал номинациялар бэрилиннилэр. Гран При хаһаайыныгар — Алаһыай нэһилиэгэр, Орто Халыма улууһун дьаһалтата анаабыт 100 000 солк. сэртипикээтэ туттарылынна. Бэстибээл барылын туһунан санаатын үллэстэр дьүүллүүр сүбэ кэмитиэтэ, «Кулума» култуура киинин исписэлиистэрэ:
СӨ култууратын үтүөлээх үлэһитэ, дьүүллүүр сүбэ бэрэссэдээтэлэ О.А.Винокурова:
Улуу Кыайыы 80 сылыгар ананан ыытыллыбыт «Кыайыы салюта» уус –уран самодеятельность бэстибээлэ 10 сыл буолан баран ыытылынна. Кыайыы 75 сылыгар, хамсык ыарыы туран ханнык да тэрээһин ыытыллыбытаҕа. Гала кэнсиэркэ, саалаҕа толору мустубут дьон өрө көтөҕүллүүлээхтик хас тахсыбыт нүөмэри дохсун ытыс тыаһынан махталын тиэрдэ олордо. Толорор киһиэхэ бу буолар, кылгас да буоллар, дууһа үөрүүтүн дуоһуйуутун «чыпчылҕан» түгэнэ. Олохторун култуура эйгэтигэр анаабыт бар дьонун өрүү үөрдэ сылдьыбыт сыана бэтэрээннэрэ, 85 сааһыгар сылдьар Сиэн Күөл нэһилиэгин олохтооҕо Евдокия Бандерова «Алгыс тойуга», 65 сыл баянын кууһа сылдьар Хатыҥнаахтан Василий Сибиряков, дьон сыанаҕа куруук күүтэр ырыаһыта, Арҕахтаахтан, Мстислав Федоров «Холобур, чиэс, бэриниилээх буолуу» номинация ылбыттара элбэҕи туоһулуур. Билиҥҥи кэм күүстээх кэрэ куоластара, Сиэн Күөл нэһилиэгиттэн Станислав Бандеров «Кыайыы куолаһа», Василий Лаптев «Көмүс баритон» номинациялары ылыахтарын ыллылар. Березовка нэһилиэгиттэн, ыраах айаны аахсыбакка кэлэн кыттыыны ылбыт, билиҥҥи көлүөнэ ыччата норуоттарын култууратын умнубакка салҕыы сайыннаралларын көрдөрбүттэрэ киэҥ биһирэбили ылла, инникитин да өрүү көхтөөхтүк кыттарга бэлэмнэрин эттилэр.
Нэһилиэктэрбит уопсай бэлэмнэрин көрдөххө, туох кыах баарынан бэстибээл тиэмэтин арыйарга үлэлэспиттэрэ көстөр. Мин санаабар, кэлэр көлүөнэҕэ сэрии сылларынааҕы тыыл бэтэрээннэрин, «1941-1945 сс. үлэҕэ килбиэннэрин иһин» мэтээллээх дьоммут туһунан олох чорботон туран кэпсиэххэ, тиэрдиэххэ, наар да сэрии сылларыгар тахсыбыт элбэх кинигэттэн көрөн, сыалай театральнай композицияны көрдөрүөххэ сөп дии саныыбын. Кэнчээри ыччат сибээһэ онно сыттаҕа… Толоруу таһыма үрдүк буоларыгар, элбэх бэлэмнэнии эрэйиллэрин бука бары билэбит. Аныгы үйэҕэ тиэхиньикэ элбэх курдук да, нэһилиэктэн кытта кэлии, айан-сырыы ороскуоттаах, уустуктардаах буолла. Бэстибээл уопсай харчытын аҥаара нэһилиэктэргэ бэриллибит буолан, уопсай призовой пуонда көҕүрээбитэ. Олох инники баран иһэр, туохтан да чаҕыйбакка, култуура фронун үлэһиттэрэ, дьон духуобунай эйгэтин арыйааччылар, инникитин да, бар дьонун үтүөҕэ-кэрэҕэ иитэ-үөрэтэ, угуйа туруохтара диэн эрэнэбин.
Николай Тырылгин «Колымчане» ВИА бөлөх салайааччыта, мэлэдиис, ааптар:
«Аан маҥнайгыбын улуустааҕы үрдук таһымнаах бэстибээлгэ дьүүллүүр сүбэ бөлөҕөр олордум. Халымабыт кэрэ эйгэтин талааннаах дьоно мустан, ыллам ырыаларын, хомоҕой хоһооннорун, кэрэ үҥкүүлэрин көрөөччү дууһатын таарыйа толорбуттара дьону олус үөртэ. Толорооччу ис сүрэҕиттэн, ырыа, үҥкүү ис хоһоонун биэрэн, эбэлэрбит эһэлэрбит ааспыт кыһалҕалаах эрэйдээх кэмнэрин өйдүүрэ көстөр. Исписэлиис буоларым быһыытынан, салайааччыларга туһаайан, ырыа фонограмматыгар (минус), үҥкүү муусукатыгар, хаачыстыбатыгар болҕомто ууралларыгар санаабын тиэрдиэм этэ. Толоруу үрдүк таһыма, тыас-уус кэриҥиттэн олус тутулуктаах. Билиҥҥи интэриниэт, куйаар үйэтигэр тугу баҕарар булуохха, тупсаран оҥоруохха сөп. Бука бары кыттыылаахтарга махталбын, айымньылаах үлэлэригэр ситиһиини баҕарабын.»
Надежда Григорьева, СӨ култууратын туйгуна, «Кустук» оҕо образцовай үҥкүү ансаамбылын салайааччыта:
«На фестивале было представлено много разножанровых и разнохарактерных танцев. На гала концерте было отобрано 5 танцев. В которых максимально широко раскрыт дух патриотизма, многонациональности нашей старны, богатство и гостеприимство северного края. Хореография, как и любой вид искусства, требует каждодневной, кропотливой РАБОТЫ, в повседневной суете бывает очень сложно уделить время на отработку танцевальных номеров, но все участники художественной самодеятельности достойно справились с поставленной задачей. Хотела бы отметить танец «Алгыс үҥкүүтэ», поставленный художественной самодеятельностью с.Налимск (руководитель Розалия Михалева). Они и стали лучшим танцевальным коллективом фестиваля. Хотелось бы поблагодарить всех участников фестиваля. «Салют Победы» — это прежде всего дань уважения ветеранам ВОВ, ветеранам тыла и детям войны.»
Олеся Шевченко, «Дьүрүһүй» фольклорнай ансаамбыл салайаач-чыта:
«Фольклор жанрын аҕыйах нэһилиэккэ көрдүбүт. Березовка нэһилиэнньэтигэр үгэстэрин, ырыаларын, матыыптарын тута сылдьар ыччатыгар туһунан махтал, хайҕабыл. Бэлиэтиэхпин сөп, Бастакы Хаҥалас нэһилиэгин туруорууларын, кинилэр фольклор үгүс жанрын, тойугу, чабырҕаҕы, норуот ырыатын, оһуохайы киллэрбиттэр этэ. Налимскай Далбар хотуттара Розалия Михалева туруоруутугар «Алгыс үҥкүүтүн» сэргээтим. Манна кыттааччылар бары тэбис тэҥ былааччыйа тиктэн, былаат баанан, биир тэҥ ытарҕа иилинэн, кытыйаларын Уус Алдан мандар ууһугар сакаастанан оҥорторон тахсыбыттара бары хайгыы көрдүбүт. Тус баҕа санаабынан, фольклор көрүҥнэрин аныгылатан, композициянан ылсан «пластическай» ньыманан туруоран, олохтоох ааптардар айымньыларын, Халыма норуотун айымньыларын сөргүтүүгэ ылсыахха диэн ыҥырабын.»
Ааптар: Саргылана Кокорина