Бу күннэргэ социальнай ситимнэргэ билиҥҥи кэм киһитин сүрэҕэр нүөлүйэ киирэр, ис дууһаны таарыйар «Күүтэбит» ырыа тарҕанан, дьон биһирэбилин ылла.
Бу ырыа, биһиги уолбут, чаҕылхай талааннаах ыччаппыт, муусука, ырыа айааччы, «Кулума» култуура киинин «Колымчане» бөлөх салайааччыта Николай Тырылгин айымньыта буолар.
Саҥа ырыа дьон киэҥ көрүүтүгэр, истиитигэр «Мы вместе-сила» аһымал кэнсиэр саҕана сүрэхтэннэ. Ырыа туһунан ааптар бу курдук билиһиннэрэр:
«Бу ырыам, эдэр ырыаһыттар түмсүүлэринэн олохтоммут «Ырыа аргыс» ансаамбылым толоруутунан тахсыбыт иккис ырыам буолар. Бу иннинэ, быйылгы үбүлүөйдээх ыһыах саҕана, эр дьон квартетынан «Халыма куо» ырыам тахсыбыта. «Күүтэбит» ырыабын кэрэ аҥардар: Олеся Шевченко, Екатерина Сыроватская, Сахая Винокурова, Анна Волкова, Анжелика Кузьмина, Марина Винокурова толорууларынан сүрэхтэннэ. Ырыабытыгар олохпут билиҥҥи уустук кэмэ, ахтылҕан, түмүгэ суох күүтүү, күүстээх санаа, үтүөҕэ кэрэҕэ, эйэлээх сырдык олоххо эрэнии ойууланар. «Тэтим» саха араадьыйатыгар ырыаларбыт тахсаллар. Кэнники айымньыларбытыттан Екатерина Сыроватская «Хаамабын», Иннокентий Дьячков «Умнума» ырыалара сүрэхтэнэн тахсыбыттара. «Күүтэбит» саҥа ырыабытын көҥүл бэрилиннэҕинэ киэҥ эйгэҕэ иһиллиэҕэ диэн эрэнэбит. Маны сэргэ ырыаларбыт Dobun.biz телеграм ханаалга тахсар буолуохтара, онон ити ситимҥэ сурутан, үрдүк хаачыстыбалаах оҥоһуллубут ырыаларбытын хачайдаан истиэххитин сөп буолуоҕа.
Бу ырыабын анал байыаннай дьайыыга кытта сылдьар «Север» диэн позывнойдаах убайбар, доҕотторбор, биир дойдулаахтарбар, кинилэр дьиэ кэргэттэригэр аныыбын».
Ааптар: Саргылана Кокорина
Фото: Саҥа ырыа ааптара уонна толорооччулара / Автор: Саргылана Кокорина