Кулун тутар 6 күнүгэр Орто Халыма улууһун дьаһалтатын баһылыга Иван Васильевич Лаптев уопсастыбаннай актыбыыстары — Ытык Сүбэ, улуустааҕы бэтэрээннэр кэмитиэттэрин саҥа састаабын уонна «Үһүс көлүөнэ оскуолата» кытта көрүстэ.
Баһылык улууска олох-дьаһах тэтимин, үлэ былааннарын кытта сиһилии билиһиннэрдэ. Нэһилиэктэргэ чоҕу тиэйии былаана туолбакка турарынан, өрөспүүбүлүкэ салалтата күүстэх үлэни аттаран, тиэйии-таһыы кыһалҕалара оннуттан хамсаабытын бэлиэтээтэ. Кулун тутарга Үс Халыма дьаһалталарын баһылыктара Орто Халымаҕа түмсэн үгүс былааннаах үлэ торумнанарын иһитиннэрдэ.
Улуус баһылыгын бастакы солбуйааччыта Ю.А.Гуляев, баһылыгы социальнай хайысхаҕа солбуйааччы К.Р. Слепцова, улуустааҕы култуура управлениетын начаалынньыга А.В.Павлюк, үөрэх салаатын начаалынньыга И.Г.Портнягин уонна улуустааҕы бэтэрээннэр Сэбиэттэрин бэрэссэдээтэлэ В.Ф.Третьякова кыттыыны ылан үгүс дьон ыйытыгар сөптөөх хоруйдары биэрдилэр.
Сүбэ мунньах кыттыылаахтара Е.Н.Стручков, А.С. Волкова, В.А.Третьякова, Ю.А.Явловскай, В.Н.Бережнова үлэлээн ааспыт уопуттарын ахтан-санаан туран, салалта үлэтигэр сөптөөх ыйыы-кэрдии биэрэн, сүбэ-ама буоллулар.
Салалта үлэтин-харатын туһунан улуус хаһыатын нөҥүө ааҕан сиһилии билсиэхтэрин уонна улуус үрдүнэн ханнык тэрээһиннэр ыытыллыахтаахтарын кыбартаалынай былаан аттаралларыгар баҕардылар.
Инниктин салалтаны кытта тэҥник хардыылаан, санааны түмэн оройуон сайдыытыгар биир сомоҕо буолуохха диэн ыҥырдылар.
Маны тэҥэ улууспут салалтатын эр дьоно мустубут кэрэ аҥардарга кэлэн иһэр Аан дойду Дьахталларын күнүнэн сибэкки дьөрбөтүн уунан, долгутуулаах түгэни бэлэхтээтэ.
Ааптар Анастасия Кокорина