Сааһырбыт дьону уонна инбэлииттэри чөлүгэр түһэрэр кииҥҥэ икки нэдиэлэ сынньанан таҕыстыбыт. Хаһыакка үлэлиир киһи быһыытынан уонна бастакыбын өҥөнөн туһам-мыппынан Киин үлэтин кытта кылгас-тык билиһиннэриэхпин сананным.
Бу кииҥҥэ икки сыл эрэмиэн үлэтэ ыытылынна, ол туһунан хаһыат инники нүөмэригэр аахпыккыт буолуо, онно социальнай харалта салайааччыта Любовь Оконешникова төһө суума туһаныллыбытын кэпсээбитэ. Киин сырдаабыт, истиэнэлэрэ ойуулаахтар, түннүктэрэ уларыйбыттар. Киин сэбиэдиссэйэ – Инесса Батуева, көрөр-истэр бырааһа – Файзулла Пардаев, мэдиссиинэ сиэстирэтэ – Ульяна Оконешникова. Анал көҥүллэрэ (лицензия) суох буолан, эми-тому туттубаттар. Сибилигин күнүскү эрэ эрэсииминэн үлэлиир, ол эбэтэр киэһэ олорор дьиэҕин булаҕын. Любовь Алексеевна стационар арыйарга үлэлэһэ сылдьабыт диир, элбэх хонтуруоллуур тэрилтэлэр ирдэбиллэрин толордохторуна кыаллыахтаах.
Дьэ, бастаан бу Кииҥҥэ киирэргэ уочаракка суруттарыах тустааххыт, ону социальнай харалта төлөпүөнүнэн (41-922) да билсэн сурутуоххутун сөп. Киирэр кэмҥит чугаһаатаҕына, балыыһаҕа учаастактааҕы бырааскытыгар тиийэн, анаалыстары туттаран, санаторно курортнай каартаны толоттороҕут. Дьэ силиккит ситэн, уларыттар атах таҥастаах Кииҥҥэ тиийэҕит. Айаҥҥытын ыарырҕатар буоллаххытына, сыыдам сырыылаах Родион Васильев массыынанан илдьэр-аҕалар. Ханнык да хаардаах күҥҥэ ыраас тиэргэннээх дьиэҕэ тиийэҕит. Киин тас өттүн, тэрилин (миэбэлин) туругун Руслан Бережнов көрөр-истэр.
Эһигини үөрэ-көтө Киин үлэһиттэрэ көрсөллөр, чугас аймахтарын булбут дьон курдук санааҕын ситээри сүүрэллэр-көтөллөр. Ирина Ардован утуйар-сынньанар сиргин көрдөрөр, дьиэ-уот ыраас буоларын ситиһэр. Оттон Татьяна Кондакова орон таҥаһа, сотторуҥ ыраас буоларыгар эппиэттиир. Амтаннаах астаах Светлана Кудрина аһылыкка ыҥырарын кэтэһэҕин-манаһаҕын, ас арааһын манна көрөҕүн-амсайаҕын. Өссө тахсар күҥҥэр бырааһынньыктааҕы остуолу тардан кэбиһэллэр. Ас-таҥас бириэмэтигэр баар буоларын Владимир Данилов хааччыйар.
Эрчимнээх, эмтээх илиилээх Раиса Колесова массаас араас көрүҥүн баһылаабыт, хас биирдии үлэлэһэр киһитин тус-туспа илбийэр, ханан-туох кини болҕомтотун ирдиирин туоратарга бары күүһүн уурар.
Чэбдигирэргэ сөптөөх хамсаныылары Лина Ставенская көрдөрөр, үөрэтэр. Эбии тэрил көмөтүнэн массаастаныаххын талаһар буоллаххына, кини кириэһилэни эбэтэр орону холбоон биэрэн, көрөр-истэр. Лина Ивановна саҥа корнхол оонньууну үөрэтэн, күрэх тэрийдэ. Дуобакка эмиэ кииристибит. Икки күрэх түмүгүнэн Мария Спиридонова бастаата, иккис Иван Винокуров, үһүс Елена Слепцова, үлэһиттэр бэлэмнээбит бириистэрин тутан үөрдүлэр.
Уйулҕа өттүнэн чэбдигирэргэ Сахая Винокурова үлэлэстэ. Араас ыйытыктарга эппиэттээн, бэйэбит турукпутун, олоххо сыһыаммытын биллибит. Бэйэбит илиибитинэн төлөпүөммүтүгэр харысхал, Саҥа дьыллааҕы харыйабытыгар Хаарчаана оҥорон астынныбыт. Олоҥхо дьыктаанын күнүгэр улуустааҕы бибилэтиэкэ исписэлииһэ Туйаара Кудрина кэлэн, тиэкиһи аахта, туоһу суруктары туттарда. Суруйуубут түмүгүнэн 4 киһибит «Туйгун суруксут» аатын сүкпүттэрин туһунан туоһу суруктары туттарбыттара. «Халыма долгуннара» хаһыат эрэдээктэрин кытта атах тэпсэн олорон сэһэргэстибит, эрэдээксийэ үлэтин, ситиһиилэрин билистибит, бэйэбит этиилэрбитин, санаабытын тиэртибит.
Биир үтүө күн уулуссаттан сааһырбыт киһини булан киллэрбиттэрэ, кини сатаан дьиэтигэр киирбэтэх. Үлэһиттэр итии чэйи иһэрдэн, сынньатан, оробуочайдарын ыытан, дьиэтин күлүүһүн өрөмүөннээн, арыйан биэртэрэ. Бу да түбэлтэ чэбдигирдэр Киин дьоҥҥо сыһыаннарын арылыччы көрдөрөр.
Сынньаммыт дьон анал кинигэҕэ махталларын, бэйэлэрин баҕа санааларын суруйаллар эбит. Сүрүн баҕа санаалара – хоно сытан эмтэнэр киин буолара. Бу сырдык санаа сотору кэминэн олоххо киирэригэр биһиги эмиэ баҕара хааллыбыт. Улууспут хаһыатын тиһигин быспакка сынньанааччылар, үлэһиттэр ааҕалларыгар кэлэр сылга сурутууну бэлэхтээн тарҕастыбыт.
Ааптар Светлана Третьякова