Бу күннэргэ тургутууну (аккредитацияны) ааспыт 19 хамаанда спортинг-компакт диэн күрэххэ Дьокуускай куоракка күөн көрүстүлэр.
Бу күрэхтэһии түмүгүнэн ханнык улуус хамаандата аны сыл Ньурбаҕа буолар IX Саха Өрөспүүбүлүкэтин норуоттарын икки ардыларынааҕы успуорт оонньууларыгар күрэхтэһэрин быһаарыстылар. Күрэсчиттэрбит Алексей Слепцов, Иван Ли Фу Сай, Георгий Новгородов тыҥааһыннаах күрэхтэһиигэ хамаанданан ахсыс миэстэҕэ тиксэн, улууспутугар Ньурбаҕа кыттар бастакы путевканы ыллылар. Чулуу ытааччыларбытыгар эҕэрдэ буоллун!
Күрэхтэһии ыытыллыытын туһунан Алексей Слепцов биһигини кытта санаатын үллэһиннэ:
Күрэхтэһии ыытыллыбыт уустук усулуобуйатыгар 19 саамай күүстээх утарылаһааччылар ортолоругар биирдиилээн тус киирсиигэ үс иһигэр уонна хамаанданан 10 бастыҥ иһигэр киирбиппит — бу үрдүк маастарыстыбаны уонна кытаанах дьулууру көрдөрүү буолла. 200 сыалы ытыыга икки күннээх сытыы киирсии улахан болҕомтону эрэйэр. Хас биирдии күрэх ыытыллар сирэ араас буолара, ол харах көрүүтүн куруук уларытарга, ырааҕы дьэҥкэтик сыаналаан ытары ирдиирэ. Күн-дьыл соһуччу уларыйыыта—күннээх халлаантан иккис күн курулас ардах — ытар үөрэҕи уларытары күһэйдэ. Тэриэлкэлэр сииктээххэ олох атын быһыынан көтөллөр, оннооҕор сааны тутарыҥ кытта уларыйыахтаах. Биһиги бу уустуктары туораан, Саха өрөспүүбүлүкэтин норуоттарын IX спортивнай оонньууларыгар путевканы ылары ситистибит!
Ааптар: Светлана Третьякова
Хаартыска ааптара: Нонна Миронова