Ыам ыйын 9 күнүгэр олохтоох «Күөрэгэй» култуурабыт киинигэр драма туруоруута буолла. Саха литэрэтиирэтин эдэр суруйааччыларыттан биирдэстэрэ Семен Маисов «Ийэм кэпсиирэ» айымньытыттан сэрии кэмин оҕотун оонньоммотох оҕо сааһын туһунан туруорууну көрдүбүт.
Туруорууга олохтоох «Аргыс» драм түмсүү уонна оҕолор «Маска» куруһуок иитиллээччилэрэ кытыннылар .
Салайааччы — Винокурова Евдокия Борисовна.
Оччотооҕу тулаайах хаалбыт оҕо ыарахан дьылҕатын, аас-туор олох кыһалҕатын, дьон сыһыанын арааһын артыыстарбыт олус итэҕэтиилээхтик оонньоотулар.
Сэрии ыар кэмнэрин кэпсээнтэн эрэ истэн буолбакка, бэйэлэрэ кыттан, саҥаран-иҥэрэн, туттан-хаптан көрөөччүгэ тиэрдэн эбэлэрин, эһэлэрин кытта сибээстэрин, көлүөнэ быстыспат ситимин өссө төгүл күүһүртүлэр.
Ааптар: Изабелла Ноговицына
