Улуус баһылыга Иван Лаптев тохсунньу 21 күнүттэн сылы түмүктүүр сырыылаах мунньаҕын ыытар. Түмүк мунньах, Орто Халыма куоратыгар «Кулума» култуура киинигэр тохсунньу 31 күнүгэр, 19ч.00м. буолуоҕа.
СӨ Бырабыыталыстыбатын мунньаҕа биһиги улууспутугар, СӨ тутууга миниистирэ, улууспут куратора Виктор Дмитриевич Романов бэрэссэдээтэллээх олунньу 18-22 күннэригэр ыытыллара былааннанар.
Баһылыгы кытта, улуустааҕы тыа хаһаайыстыбатын управлениетын начаалын-ньыга Дмитрий Винокуров, Орто Халыматааҕы нэhилиэнньэ уонна үлэ социальнай көмүскэлин комплекснай киинин сүрүннүүр исписэлииһэ Маргарита Винокурова, Орто Халыматааҕы кииннэммит балыыhа кылаабынай бырааһын э.т. Иван Нетребенко, саастарын ситэ илик оҕолору көрөр-истэр, кыаммат дьон быраабын көмүскүүр уорган салайааччыта Айыына Бандерова, улуустааҕы үөрэх управлениетын начаалынньыгын эбээһинэһин толорор Екатерина Слепцова, нэһилиэк олохтоохторун долгутар боппуруос тула үлэлээтилэр.
Тыа сирин олохтоохторо көхтөөхтүк кытталлар диэн улуус баһылыга мунньах хаамыытын бэйэтин тус Телеграм ханаалыгар бэлиэтиир. Олохтоох дьаһалта исписэлиистэрин, уопсастыбаннай кэрэспэдьиэннэрбит, мунньахха араас салааҕа үгүс элбэх боппуруос киирбитин туһунан иһитиннэрдилэр.
Ол курдук тыа хаһаайыстыбатын хайысхатыгар: тиэхиньикэ ылыыга көмө көрүү, сүөһү төбөтүгэр субсидия, сылгыһыттарга кэмпэнсээссийэни олохтооһун, түргэнник ситэр салаа сайдыыта, сылгы баазаларын сөргүтүү, өрөмүөннээһин, өртөөһүн боппуруостара турбуттар. Доруобуйа харыстабылыгар: быраас, исписэлиис тиийбэтэ, ФЛГ аппараат нэһилиэктэринэн сырыыта, эмп-томп боппуруоһа. Үөрэхтээһиҥҥэ: каадырынан хааччыллыы, үөрэнээччилэр, учууталлар улуус киинигэр тэрээһиҥҥэ кытта баралларыгар уматыгынан хааччыйыы, итиэннэ социальнай суолталаах, култуура, успуорт эбийиэктэрин өрөмүөннээһин, интэриниэт сибээһи тупсарыы, көтөр аалынан барыы-кэлии ороскуотугар чэпчэтиилэр, айанньыт таһаҕаһын нуорматын үрдэтии, улуустааҕы култуура отделын үлэтин сөргүтүү, анал байыаннай дьайыы кыттыылаахтарыгар анал көмө, болҕомто, эргиччи суолу олохтооһун, булт-алт болдьоҕо, көҥүл ылыы уо.д.а. элбэх боппуруос киирбит, санаа этиллибит.
Мунньахха кыттыбыт, олох-дьаһах тупсуутугар кыһаллар, нэһилиэк сайдыытыгар долгуйар дьон баһылык отчуотун сэргии иһиттилэр, аныгы технологиянан оҥоһуллубут видеосюжеты кэрэхсии көрдүлэр. Баһылык уонна кини хамаандатын чилиэннэрин хоруйдарын ылынан, бэриллибит боппуруостар быһаарыллан, олоххо киириэхтэрэ диэн эрэнэ хааллылар.
Түгэнинэн туһанан улуус Аҕа баһылыга, үөрүүлээх быһыыга-майгыга, Дойдуга Дьиэ кэргэн, СӨ Оҕо саас, улууска Үөрэхтээһин сылларын түмүгүнэн сыл бастыҥнарыгар анал кырааматалары туттарда:
Алаһыайга
«Бастыҥ волонтер» анал аат В.А.Местников аатынан орто оскуола бастыҥ үөрэнээччитигэр Андрей Кондаковка, «Дьулуур» ыччат лидерыгар Л.А. Винокуроваҕа, А.П.Никулиҥҥа Махтал суруктар, 95 ытык сааһын туолбут Алаһыай Бочуоттаах олохтооҕор, тыыл уонна үлэ бэтэрээнигэр А.Д.Третьяковаҕа Эҕэрдэ сурук туттарылынна. Нэһилиэк баһылыга э.т. Александра Пахомова, «Чуораанчык» уһуйааныгар өр сылларга сэбиэдиссэйинэн үлэлээбит, билигин даҕаны үөрэх эйгэтигэр үлэлии сылдьар М.Г. Созоноваҕа «РФ Үлэ бэтэрээнэ» дастабырыанньа туттарда.
Бастакы Хаҥаласка
Атыы-эргиэн сайдыытыгар кылааттарын, нэһилиэнньэни хааччыйыыга көмөлөрүн иһин олохтоох урбаанньыттарга Е.Г.Томскаяҕа уонна А.В. Винокуроваҕа Махтал суруктар туттарылыннылар.
Иккис Хаҥалас
СӨ тутууга министиэристибэтин Махтал суругунан уһун кэмнээх үтүө үлэтин иһин С.Е. Слепцов, СӨ ыччакка уонна социальнай коммуникация сайдыытыгар кылаатын иһин Р.Д. Слепцова, улуус баһылыгын Бочуоттаах кыраамататынан Бэтэрээннэр Сэбиэттэрин бэрэссэдээтэлэ С.И. Слепцова уонна олохтоох ДЭС начаалынньыга П.И. Сивцев наҕараадаланнылар.
Иккис Мээтис
СӨ ыччатын уонна социальнай коммуникация сайдыытын министиэристибэтин аатыттан Махтал суругунан М.Д. Сергеева, улуус Бочуоттаах кыраамататынан, атыы-эргиэн сайдыытыгар үтүө өҥөтүн иһин И.И.Слепцова, тыа хаһаайыстыбатын сайдыытыгар кылаатын иһин М.Г. Березкин, Сыбаатай орто оскуолатын математикаҕа учуутала Н.В.Тырылгин, үөрэхтээһин эйгэтигэр ситиһиилээх «Бастыҥ педагог- дьиэ кэргэн» анал аатынан Мария Александровна уонна Николай Владимирович Тырылгиннар наҕараадаланнылар.
Сиэн Күөлүгэр
Улуус баһылыгын Бочуоттаах кырааматата олохтоох ДЭС маастарыгар И.Б.Оконешниковка, олохтоох ОДьХХ хачыгаарыгар Н.Е.Шкулевка, бэтэринээргэ М.Г.Винокуровка туттарылынна.
Ааптар: Саргылана Кокорина