«Сайыҥҥы үлэ» диэн өрөспүүбүлүкэтээҕи куонкуруска ситиһиилээхтик кыттан, улуустааҕы дьарыктаах буолуу киинэ (сал. Г.Е. Михайлова) Дьокуускайга баар «Сосновый бор» оҕо сынньанар, чэбдигирэр лааҕырыгар барарга 5 босхо путевканан наҕараадаламмыта.
Бу путевкаларга сайын үлэлээбит 51 оҕо иһигэр туспа күрэх тэриллэн, чулууттан чулуулар талыллан, үлэһит оҕолорбут сынньана бараары куоракка муһуннулар. Кинилэри кытта Киин үлэлиир сиригэр көрсөн кэпсэттибит. Дьэ кыайыылаахтарбыт кимнээхтэрий:
— Люба Оконешникова, С.Н. Горохов аатынан Ойуһардаах орто оскуолатын 11 кылааһын үөрэнээччитэ. Иккис сылын сайыҥҥы сынньалаҥын туһалаахтык атаарбыт. Быйыл сайын олохтоох дьаһалта волонтерунан үлэлээбит, «Родничок» лааҕырга оҕуруот аһын көрбүт-харайбыт уонна окко көмөлөспүт. Хамнаһынан Дьокуускай куоракка бара сылдьыбыт.
— Владислав Винокуров, С.Н. Горохов аатынан Ойуһардаах орто оскуолатын 10-с кылааһын үөрэнээччитэ. Былырыын оскуолаҕа оттообут, быйыл сайын от биригээдэтигэр үлэлээбит. Үгүөрү харчы аахсан, дьонуттан көмө көрдөөбөккө, бэйэтэ таҥаһын, оскуолаҕа үөрэнэр малынан-салынан хааччыммыт.
— Станислав Кудрин, Г.Г. Софронов аатынан Өлөөкө Күөл агрохайысхалаах орто оскуолатын 10 кылааһын үөрэнээччитэ. Сайыҥҥы ыйдарга Өлөөкө Күөллээҕи хааһынай сылгы Собуотугар үүт астыыр сыахха үлэлээбит. Үүт эрийэн, сүөгэй, арыы оҥоруутунан дьарыктаммыт. Ый ахсын 20-лии тыһыынча хамнастаммыт. Бу харчытын бэйэтэ бас билэн, тугу баҕарарын атыыластыбыт.
— Марина Тырылгина, Н.И. Шарин аатынан Орто Халыма орто оскуолатын 9-с кылааһын үөрэнээччитэ. Аҕата 2022 сылтан быстах хомуурга түбэһэн, анал байыаннай дьайыыга сылдьар. Марина сайын куорат дьаһалтата тэрийбит волонтердар лааҕырдарыгар үлэлээбит.
— Дьулустан Кириллов, Г.Г. Софронов аатынан Өлөөкө Күөллээҕи агрохайысхалаах орто оскуолатын 9-с кылааһын үөрэнээччитэ, Махса диэн учаастакка сылгыһыт көмөлөһөөччүтүнэн иккис сылын үлэлээбит. Үлэлииригэр көмөлөспүт аҕа табаарыстарыгар Николай Александровичка, Константин Константиновичка махталын биллэрэр.
Бу күннэргэ ПрофТур диэн тэрээһиҥҥэ кыттан, тэрилтэлэргэ сылдьан, идэлэри кытта билистилэр. Ол курдук, «КЕНиКомпаньон» хампаанньаҕа тыраахтарга олорсон, хайдах үлэлииллэрин көрдүлэр, саҥа дьиэлэри тута сылдьар тэрилтэлэргэ үлэһиттэр идэлэрин ыйыталастылар, тутуу матырыйаалын хайдах оҥороллорун биллилэр. Улахан кылаас оҕолоро буолан, ханнык идэни талалларын толкуйдуу сыл- дьаллар, онон бу тэрээһини бэркэ сөбүлээбиттэр, интэриэһиргээбиттэр.
Үлэһит оҕолору өйөөн, айаннарын «Орто Халыма улууһа (оройуона)» муниципальнай тэриллии салалтата (баһылык И.В. Лаптев), улуустааҕы үөрэх управлениета (нач. А.П.Петрова) уйуналлар. Онон бу ый 5-18 күнүгэр диэри өрөспүүбүлүкэ биир бастыҥ оҕо сынньанар, доруобуйатын чэбдигирдэр киинигэр саҥаны билэн-көрөн, сынньанан, атын улуус оҕолорун кытта бодоруһан үүнэн-сайдан кэлиэхтэрэ.
Светлана Третьякова.