Эбээхтэр IT-технологиялары баһылыыллар

Сыл ахсын ыытыллар Хакатон РЕАК- IT күрэҕэр Д.С. Слепцов аатынан Эбээх орто оскуолатын сэттис кылааһын үөрэнээччилэрэ Ильдар Колесов уонна Антон Слепцов кытыннылар. Бу Аан дойду таһымнаах Бүтүн Арассыыйатааҕы билим түмсүүтүн тэрээһиннэрин иһинэн ыытылынна. Барыта 50-н тахса хамаанда кыттыбыт улахан күрэҕэ буолла.

Оҕолор манна бэйэлэрэ оҥорбут «3Д-модель для принтера: органайзер для канцелярских принадлежностей» диэн саҥа көрүүлээх (инновационнай) үлэлэринэн кытыннылар уонна кытаанах көрдөбүллээх жюрига көмүскээтилэр. Үлэни сыаналааччылар үөрэнээччилэр үлэлэрэ хаачыстыбалаахтык оҥоһуллубутун уонна туох баар ирдэбили барытын тутуспуттарын бэлиэтээтилэр.

Ильдар уонна Антон үлэлэрэ үрдүктүк сыаналанан, бастакы миэстэҕэ эрэллээхтик тигистилэр. Бу үөрүүлэрин кинилэр салайааччылара С.В. Гуляева (Винокурова), О.В. Колесова үллэһиннилэр.

Аартыка ыраах муннугар да баар буолларбыт, оҕолорбут IT-технологиялары киин куорат үөрэнээччилэриттэн хаалсыбакка тэҥҥэ баһылыылларыттан үөрэбит уонна өссө салгыы сайда туралларыгар баҕарабыт.

Ааптар: Светлана Третьякова

Читайте дальше