Самаан сайын саҕаланан оҕолор күүтүүлээх сынньалаҥнара тиийэн кэллэ. Күүппүт кэрэ кэммитин бары араастык былаанныыбыт. Ким эрэ сынньана лааҕырдыыр, ким эрэ оттуур, ким эрэ дьиэтээҕи үлэҕэ көмө буолар. Оттон ким эрэ үлэ булунан үлэлиир.
Бөһүөлэкпит туллар тутааҕа — Өлөөкө Күөллээҕи сылгы собуота. Манна сайын аайы улахан кылаас үөрэнээччилэрэ күүс-көмө буолаллар. Бу сайын 5 оҕо бэс ыйын 18 күнүттэн сүөһү пиэрмэтигэр үлэҕэ киирдилэр.
Дьулустаан Кириллов 10 кылааһы бүтэрэн, үүт астыыр сыахха көмөлөһөөччүнэн киирдэ. Быйыл саҥа үлэлиир. Түөрт ыанньыксыттан 170 киилэ үүтү тутан астаан нэһилиэк, улуус олохтоохторугар сүөгэйи, арыыны, йогурду атыыга таһаараллар. Дьулустаан ааспыт сайыннарга сылгыһыт көмөлөһөөччүтүнэн үлэлээн 2024 сыл түмүгүнэн «Тыа хаһаайыстыбатын эрэлэ» анал аат хаһаайынынан буолта.
Игнат Винокуров 9 кылааһы бүтэрэн ньирэй иитэччигэ көмөлөһөөччүнэн үлэлиир. 40-ча ньирэйи көрөр-харайар. Ньирэйдэр тэлликтэрин уларытан, от тобоҕун ыраастаан, үүт сыаҕыттан эриллибит үүтү (обрат) таһан аһатар. Кини үлэтин сөбүлээн эһиил эмиэ киирэр санаалаах.
10 кылааһы бүтэрбит Спиридон Винокуров төрөппүттэрин кытары Чоҥкуйа учаастагар оттуурга былааннаммыт. Кини былырыын эмиэ оттообут, ол иннинэ сылгыһыт көмөлөһөөччүтүнэн Чоҥкуйаҕа хас да сыл сайылаабыт. Онон Чоҥкуйа учаастага дойдута да диэххэ сөп.
Оҕолор сайыннарын туһалаахтык атаараллара хайҕаллаах. Оҕо саастарыттан үлэҕэ үөрэхтээх, олоххо бэлэмнээх дьон буола иитиллэн тахсаллара тус олохторугар туһалаах буолуоҕа.
Эля Сухомясова,
Өлөөкө Күөл орто оскуолатын 10 кыл. үөрэнээччитэ
Бииргэ үөрэнэр доҕотторум бэс ыйын 18-тан сылгы собуотун сүөһү пиэрмэтигэр үлэлэрэ саҕаламмытын истэн ыйыталастым.
Сайаана Созонова, 9 кылаас үөрэнээччитэ:
«Ыанньыксыт көмөлөһөөччүтүнэн үлэлиибин. 6-с кылаастан сайын аайы ийэбин кытары үлэлиир буоламмын ыарырҕаппаппын, барытын билэбин уонна сатыыбын.
Үлэбит сарсыарда 6 чаастан саҕаланар. Куйаас, бырдахтаах күҥҥэ үлэлииргэ ыараханыттан тыаллаах, сөрүүн күннэри күүтэбит. Ол да буоллар үлэбин олус сөбүлүүбүн».
Аполлон Винокуров, 9 кылаас үөрэнээччитэ:
«Мин быйыл бостуук көмөлөһөөччүтүнэн үлэлииргэ кэпсэттим. Сопхуос бостуугун кытары 70-ча ынаҕы көрөбүт. Күҥҥэ иккитэ үүрэн аҕалабын уонна төттөрү мэччирэҥнэригэр салайабын. Бырдахха сүөһү көрөр олус ыарахан. Ол иһин сүөһүнү сынньатар, мэччирэҥнэригэр аһатар сыалтан түптэлиибит. Манна уоттан сэрэхтээх буолууну тутуһабыт.
Үлэбит сарсыарда эрдэттэн саҕаланар уонна киэһэ хойут бүтэр. Быйыл саҥа үлэлээтим. Үлэм ыарахан да буоллар сөбүлээтим. Эһиил да киириэм диэн былаанныыбын».
Доҕотторум төһө да ыарахан үлэҕэ киирдэллэр үлэлэрин сөбүлүүллэр. Маннык үлэ оҕоҕо эбии дохуоту эрэ буолбакка олоххо наадалаах буолар уопуту, умнуллубат кэрэ түгэннэри бэлэхтиир.
Күнү быһа дьиэҕэ төлөпүөн тутан олорордооҕор сибиэһэй салгыҥҥа үлэлии-хамсыы, туһалааҕынан дьарыктана сылдьар ордук. Үлэлиир киһи өйдүүн-санаалыын улаатар, сайдар, күүстээх, билиилээх, тулуурдаах буолар.
Сааскылаана Бубякина,
Өлөөкө Күөл орто оскуолатын 9 кылааһын үөрэнээччитэ