Самаан сайыннаах Оһуохай күнүн, С.Н.Горохов аатынан Ойуһардаах орто оскуолата, ыһыах ыһан көрүстэ.

Бу үтүө күҥҥэ тоҕуоруһа мустубут ыалдьыттарга анаан, оҕолор уйгу- быйаҥ ыһыаҕынан эҕэрдэлээн, ыллам ырыа ыллаатылар, хомустаан дьүрүһүттүлэр, чабырҕах эттилэр, нарын үнкүү үҥкүүлээтилэр.

Тэрээһиммит сүрүн  чааһыгар, илиилэртэн ылсыһан, оһуохайдаан ойдубут, эһиэкэйдээн тэйдибит.

Ол кэннэ күүстээх уолан уолаттар,  «Кыыс сырсыыта», «Бэйэм оҥорбут оҕум», «Өбүгэ оонньуута» күрэстэргэ күөн көрүстүлэр.

Кыргыттарга «Уһун суһуох», «Бэйэм оҥорбут киэргэлим» куонкурустар буоллулар.

Бу күн, хас биирдии оҕо, өбүгэтин үгэһин тутуһан сахалыы сиэдэрэй таҥаһын таҥнан- симэнэн кэлбитэ киһини үөрдэр. Үөрүүлээх тэрээһиммит, түһүлгэбит маанылаах сандалытын амтаннаах  аһын тула түмсүүнэн түмүктэннэ.

Евдокия Винокурова