Арассыыйа салалтата сааскы өртөөһүнү булгуччулаахтык тохтоппута, ол оннугар күһүҥҥү өртөөһүҥҥэ балаҕан ыйын 16 күнүттэн сириттэн көрөн киэҥник ыытары наадалааҕынан аахпыта.
Быйыл «Кыым» хаһыат кулун тутар 30 күнүнээҕи уонна бэс ыйын 15 күнүнээҕи нүөмэрдэригэр Үөһээ Бүлүүгэ ыытыллыбыт өртөөһүн туһунан суруллубута. Бу сурук ис хоһоонунан РФ сокуонугар өртөөһүнү букатыннаахтык бобуу диэн суох эбит. РФ бырабыыталыстыбата, Рослесхоз өртөөһүнү тохтотор туһунан туһааннаах дьаһаллары ыытар эбиттэр.
Үөһээ Бүлүү баһылыга В.С.Поскачин Саха сирин салалтатыгар, олохтоох лесхозка, Якутлесресурс, МЧС уонна олохтоох нэһилиэк салалтатыгар өрт хампаанньатын ыытарын туһунан биллэрбит уонна улуус ыксаллаах быһыыга-майгыга хамыыһыйатынан уураах таһаартарбыт. Сөп буолар тиэхиньикэни, анал дьону мунньан Үөһээ Бүлүү улууһун Сургуулук нэһилиэгэр ыам ыйын 12 күнүттэн балайда киэҥ сири кэтээн туран өртөөбүттэрэ атыттарга холобур буолуохтаах.
Ол аата, сокуону тутуһан, тиэхиньикэни аттаран, көҥүлү ылан, саас аайы киэҥ сирдэри өртөөн, туһаҕа таһаарар кыах баар эбит. Күһүҥҥү ылааҥы күннэри туһанан, хаар түһүөр диэри быраҕыллыбыт ходуһалары, мэччирэҥнэри өртөөн, үтүө дьыалаҕа тэриллиилээхтик кыттаргытыгар ыҥырабын.
Иннокентий Оконешников.