Алаһыайдар быйыл, төрөөбүт нэһилиэктэрэ 90 саастаах үбүлүөйдээх сылларын бэлиэтээтилэр. Бэлиэ сыл чэрчитинэн үгүс элбэх тэрээһин ыытыллыбыта. Кэлэр да сыл, олохтоох бүддьүөт дьокутааттарынан тыырыллан, былаан бөҕө бигэргэнэн, нэһилиэнньэ сайдыы суолугар үктэнэргэ бэлэм олорор. Бүгүҥҥү хаһыаппытыгар, Алаһыай сонуннарыттан билиһиннэрэр, олохтоох дьаһалта баһылыгын солбуйааччы Александра Ивановна Пахомова.
Ыспыраапка: бу күн Алаһыай нэһилиэгэр 334 киһи олохсуйан олорор, сурукка киирбитинэн 495 киһи бэлиэтэммит. Устудьуон — 32. Тыыл бэтэрээнэ — 5, урбаанньыт — 3, сэрии сылын оҕото — 10. 151 биэнсийэлээх баарыттан 24-дэ үлэһит.
Тыа хаһаайыстыбата
400 туонна от оттонон кыстыгы бэлэм көрүстүбүт. Биир сүөһү ииттэр бааһынай тэрилтэлээхпит. Бу күҥҥэ 53 ынах сүөһүлээхпит.
Мантан 29 ыанньык ынах. 220 сылгылаахпыт, 131 биэ. Быйыл 1,5 туонна эбиэс, 2 туонна 400 киилэ комбикорм ситтибиппит, онон эбии аһылыкка хаһаас баар.
Үөрэхтээһин
В.А.Местников аатынан орто оскуолаҕа 59 оҕо үөрэнэр. Аһаҕас вакансия математика уонна нуучча тылын учууталларыгар турар. «Чуораанчык» оҕо уһуйаана 28 иитиллээччилээх.
Быйыл уһуйаан дьиэтэ, «Эркин» эр дьон субуотунньуктарын күүһүнэн эбийиэк үрдэ ититиллибитэ.
Олохтоох бэйэни салайыныы
Чох, уматык кэмигэр тиэллэн, социальнай суолталаах эбийиэктэр, тэрилтэлэр кыстыгы бэлэм көрүстүлэр. Олохтоох нэһилиэнньэ көҕүлээһинин өйүүр бырагыраама чэрчитинэн, ыһыах ыһар былаһаакканы оҥорорго быйыл сайаапка ыытылынна.
Бу кэмҥэ Алаһыай нэһилиэгиттэн 11 киһи анал байыаннай дьайыыга кытта сылдьар. Кинилэр истэригэр нэһилиэк- пит аҕа баһылыга баран турар. Бу сыл аһымал аахсыйанан 140 киилэ тоҥ ас оҥоһуллан, анал байыаннай дьайыыга ыытыллыбыта. Олохтоох бүддьүөттэн 3 устуука түүҥҥү бириэмэҕэ көрөр анал тээбирини ылан ыыппыппыт.
Быйыл үбүлүөйдээх сылбыт чэрчитинэн Ат сүүрдүүтэ, Буран сырсыыта, «Ыллаа-туой, Халыма ыччата», «Ыччат Баала», «Дьиэ кэргэн-2024» уо.д.а.улуус таһымнаах тэрээһиннэр ыытыллыбыттара. Дьиэ кэргэн сылынан, Алаһыай элбэх оҕолоох ийэлэрин тустарынан сырдатар-кэпсиир, Евдокия Созонова түмэн таһаарыытынан «Алаһыайым күн күбэй ийэлэрэ» кинигэ-альбом күн сирин көрбүтэ. Манна 32 ийэ олоҕо- дьаһаҕа, дьиэ кэргэнэ сурукка тиһилиннэ.
Олохтоох ааптардарга уонна кинилэр айымньыларыгар аналлаах, Алаһыай эбэбит биэрэгэр анал стела туруорулунна. Бу Евдокия Кондакова бырайыагынан олоххо киирбитэ. Маны сэргэ олохтоох бүддьүөттэн «Ааспыты арыйан ааҕыахха» хаартыскаларынан кинигэ оҥоһуллан тахсыбыта.
Быйыл «40 лет Победы» уулуссанан ааһар эргэ ититии систиэмэтэ саҥардылынна. 20-тэн тахса ыалга, олохтоох бүддьүөттэн профлист ылыллан, олбуордара саҥардылынна. Эргэ оскуола эбийиэгин көтүрэн, сирин дэхсилээн, миэстэтин быраас амбулаторията тутулларыгар бэлэмнэнилиннэ.
Киин спортивнай былаһааккабыт муостатын саҥартыбыт. Ыһыахтыыр түөлбэбитигэр үс эркиннээх 3 балаҕан тутулунна. Кэлэр сыл Кыайыы 80 сылыгар анаан, Бэтэрээннэр искибиэрдэригэр саҥардыы үлэтин саҕалаатыбыт.
Дьиэ кэргэн
Арассыыйаҕа Дьиэ кэргэн сылыгар аналлаах улуустааҕы «Бастыҥ уһаайба — 2024» кэтэхтэн көрүү куонкуруһугар Пелагея Алексеевна уонна Сергей Александрович Еремеевтар уонна Альбина Ивановна Кондакова уонна Гаврил Иннокентьевич Созонов дьиэ кэргэттэрэ кыттыбыттара. Маны сэргэ улуустааҕы «Дьиэ кэргэн — 2024» кэтэхтэн көрүү куонкуруһугар Альбина Ивановна, Гаврил Иннокентьевич «Дьиэ кэргэн үгэһин харыстааһын» (Хранители семейных традиций), оттон Дарина Александровна уонна Николай Николаевич Кондаковтар «Бастыҥ эдэр ыал» анал аакка тиксибиттэрэ. Быйыл Дария Федотовна Лаптева уонна Василий Васильевич Кондаков ыал буолан олорбуттара 50 сылларын бэлиэтээтилэр.
Киэн туттар кэрэхсэбиллээх сонуммутунан, биир дойдулаахпыт, Алексей Созонов өрөспүүбүлүкэтээҕи «Дыгын оонньуулара» күрэххэ кыттан улууһун ааттаппытыттан олус астынныбыт. Спортсмен уолбутугар инникитигэр үрдүк ситиһиилэри баҕарабыт.
Үүнэр сыл сүрүн былааннара
Кэлэр сыллааҕы бүддьүөтү дьокутааттар бигэргэттилэр. Сүрүн үлэнэн, «Сарыал» култуура киинэ өрөмүөннэниэхтээх. Маны сэргэ Ан-3 түһэр былаһаакката оҥоһуллуохтаах.
Эһиил, үгэс курдук сылын аайы ыытыллар тэрээһиннэртэн, А.В.Сухомясов аатыгар оҕолорго көҥүл тустуу, К.К.Созонов 75 сааһыгар аналлаах өрөспүүбүлүкэ таһымнаах Мас тардыһыыта, кулун тутарга ыччат спартакиадата буолаллара былааннанар.
Уопсастыба
«Кэскил», «Кэнчээри», «Саһарҕа» түөлбэлэрбит, эдэр ыччат«Дьулуур», «Тэтим» орто саастаахтар, «Ситим» бэтэрээннэр Сэбиэттэрэ, Дьахтар кэмитиэтэ, «Эркин» эр дьон түмсүүлэрин үлэлэринэн, тэрилтэлэрбит өйөбүллэринэн, нэһилиэк сайдар, элбэх үтүө күргүөмнээхтик хамсааһын ыытыллар, араас тэрээһин тиһигин быспакка ыытыллар.
Түгэнинэн туһанан үлэ тэрилтэлэригэр, уопсастыбаннай түмсүүлэргэ олохтоох дьаһалта аатыттан барҕа махталбытын биллэрэбит. Өрүү көхтөөх, түмсүүлээх буолуоҕуҥ.