Кулун тутар 20 күнүгэр улуус оскуолаларыттан: Орто Халыматтан, Налимскайтан, Хатыҥнаахтан, Ойуһардаахтан, Сылгы-Ыытартан, Өлөөкө Күөлүттэн, Эбээхтэн, Арҕахтаахтан 8 кылаас салайааччыта үлэлэрин уопутун, сатабылларын көрдөрөр куонкуруска кытыннылар.
Кыттааччылар дойдуга бэриниилээх буолуу тиэмэтигэр кылаас чааһын ыыттылар, үлэлэригэр туттар сатабылларын, маастар кылааһын көрдөрдүлэр. Кылаастарын уонна бэйэни билиһиннэрии, ыйытыыларга эппиэттээһин түһүмэхтэрин аастылар. Маны барытын түһүмэхтэр аайы атынтан атын араас оскуолалартан түмүллүбүт дьүүллүүр сүбэ сыаналаата.
Кылаас салайааччылара бары эдэр педагогтар буолан, бииртэн биир ураты, интэриэһинэй, аныгылыы көрүүлээх-истиилээх дьарыктары көрдүбүт. Куонкурус түмүгэр муҥутуур кыайыылааҕынан Д.С.Слепцов аатынан Эбээх орто оскуолатын социальнай педагога, 11-ис кылаас салайааччыта Марианна Ивановна Ушакова буолан аалай лиэнтэ кэттэ. I-кы истиэпэннээх дипломан аатын Н.И.Шарин аатынан Орто Халыма оскуолатын алын кылаас учуутала Ксения Пантелеймоновна Коркина ылла. II-с истиэпэннээх дипломан В.А.Местников аатынан Арҕахтаах орто оскуолатын психолога Владимира Егоровна Слепцова, оттон III-c истиэпэннээх дипломан С.Н.Горохов аатынан Ойуһардаах орто оскуолатын алын кылаас учуутала Мария Петровна Колесова буоллулар. «За творчество и оригинальность» анал ааты Налимскай орто оскуолатын физкультура учуутала Сардаана Николаевна Кудрина, «За находчивость и смекалку» Г.Г.Софронов аатынан Өлөөкө Күөл орто оскуолатын социальнай педагога Айсена Анатольевна Васильева, «За оптимизм и веру в детей» Хатыҥнаах орто оскуолатын психолога Марфа Михайловна Шкулева, «За эрудицию и волю к победе» А.Н.Явловскай аатынан Сылгы Ыытар орто оскуолатын омук тылын учуутала Юрий Афанасьевич Саввинов ыллылар. Бары кыттааччылар, кыайыылаахтар добун суруктары, өйдөбүнньүк бэлэхтэри ыллылар.
Бэрт туһалаах, наада- лаах тэрээһинтэн олус астынан, элбэҕи көрөн-билэн, туһанарга сананан, эдэр кэллиэгэлэр билсиһэн, бэйэ-бэйэлэрин уопуттарын атастаһан тарҕастылар.
Улуустааҕы тэрээһини олус сатабыллаахтык аттаран, бэрт үчүгэйдик тэрийэн ыыппыт Налимскай оскуолатын кэлэктиибигэр кыттааччылар, ыалдьыттар ааттарыттан барҕа махталбытын этэбит.
Ааптар Изабелла Ноговицына