Бу дьыл бэс ыйын 29 күнүгэр А.Е.Кулаковскай-Өксөкүлээх Өлөксөй аатынан Норуоттар Доҕордоһууларын дьиэтигэр биһиги биир дойдулаахпыт Орто Халыма орто оскуолатын 1966 сыллаахха 11 кылааһы бүтэрбит философскай билим хандьыдаата Василий Иванович Оконешников үлэтигэр аналлаах дьоһун тэрээһин ыытылынна.
Ол курдук илиинэн быысыбайдамыт, кыбытыгынан тигиллибит «Уран уйулҕа» иистэнньэҥнэринэн тигиллибит оһуордаах көбүөр биһирэмэ буолла. Бу күн үрдүк кирилиэһи дабайан, биир дойдулаахтарбын, үөлээннээхтэрбин көрсөн кэҥэс саалаҕа толору муһуннубут. Тэрийээччи Татьяна Софроновна Софронова — утумнааччы, норуот маастара эбит. Кини Василий Ивановиһы кытта билсэн, үөрэҕин ылынан, биһирээн билигин утумнааччы, тарҕатааччы буолбут. Татьяна Софроновна биир эйгэлээх дьүөгэлэрэ муус устар 12 күнүттэн саҕалаан бэс ыйын 30 күнүгэр, оруобуна 80 хонугунан, бу «Новемологическая таблица Периодической системы Менделеева Д.И.» диэн көбүөрдэрин көрдөрүүгэ туруордулар.
Василий Иванович Оконешников Орто Халыма орто оскуолатын бүтэрэн, Новосибирскайга электротехническай институту ситиһиилээхтик үөрэнэн бүтэрбитэ. Философскай билим хандьыдаата этэ. Оскуолаҕа 11 кылааска диэри бииргэ үөрэммит доҕотторо Василий Иванович туһунан киэн тутта ахтан-санаан аастылар. Кини үлэтин, үөрэҕин биһирээн үйэлээх оҥоһугу саха норуотугар бэлэхтээбит Татьяна Софроновнаҕа сибэкки дьөрбөтүн туттардылар.
В.И.Оконешников үөрэҕин дириҥник ылыммыт эргиччи талааннаах Евдокия Ефимова чаҕылхай кэпсээнэ, кылыһахтаах тойуга, мэлдьи буоларын курдук, биэчэри олус киэргэттэ.
Маны тэҥэ өрүү ыҥырыыга сылдьар, киин куораттарга билиитин, дьоҕурун куруук сайыннарар, бары билинэр эмчиппит Варвара Дмитриевна Калинкина философскай билим хандьыдаатын үөрэҕэ киниэхэ төһүү күүс буоларын, доруобуйаҕа эргиччи туһалааҕын иһитиннэрдэ. Ким баҕалаах үөрэнэ кэлэригэр ыҥырда.
Космофизика Институгар бииргэ үлэлээбит доҕотторо сөҕөн-махтайан, ахтан-санаан туран Василий Иванович сүдү талаанын сиһилии арыйан кэпсээтилэр, ону тэҥэ кини «Аптаах таблицатын» туһанарга ыҥырдылар. Биир дойдулаахпыт, биллэр учуонай, саҥаны айааччы Василий Иванович Оконешников сырдык мөссүөнүгэр сүгүрүйэ, сөҕө-махтайа, кини хаалларбыт кэриэһэ дьоҥҥо-сэргэҕэ туһалыы, сайда-туругура турдун диэн киэн тутта алгыс санаалаах тарҕастыбыт.
Ааптар Варвара Третьякова, СӨ үтүөлээх бырааһа