Олох-дьаһах хаһаайыстыбатыгар таас чох тиэйиллэр. Бүгүҥҥү күн туругунан 6100 туонна чох кэлэн сүөкэннэ. Былаан быһыытынан, 30 тыһыынча кэлиэхтээҕиттэн 20% баар буолла.
Уоту биэрэр тэрилтэҕэ өрөмүөҥҥэ анаан турбалар кэллилэр. Кыһыҥҥы суол турдаҕына, Эбээх, Өлөөкө Күөл ыстаансыйаларыгар тиэрдиллиэхтээхтэр. Бу күннэргэ трансформатордар туруктарын көрөргө-истэргэ улуус киинигэр түүҥҥү өттүгэр уоту араарыахтара.
Уматык тэрилтэтигэр өрөмүөн үлэтэ бүтэ илик. Дизельнэй уматык кэлэрин күүтэллэр.
Г.Г.Колесов аатынан Аартыкатааҕы атыы-эргиэн киинигэр социальнай суолталаах табаар уу суолунан кэллэ. Бурдук, саахар, ириис, мас арыыта, туус, уопсайа 93 туонна бородуукта сүөкэниллэн, ыскылаакка дьаарыстанна. Өссө уу суолунан оҕуруот аһа кэлиэхтээх диэн үлэһиттэр кэтэһэллэр, хаһан тиэрдиллэрэ чопчулана илик.
Урбаанньыт В.Н.Галаев бэйэтин маҕаһыыныгар уонна биир идэлээхтэригэр оҕуруот аһын уу аалынан аҕалла. Куорат олохтоохторо удамыр сыанаҕа хортуоппуй, хаппыыста, луук, моркуоп, сүбүөкүлэ, дьаабылака атыылаһыннылар.
Ааптар: Светлана Третьякова
Хаартыска: Таһаҕаһы сүөкээһин / Ааптар: Светлана Кондакова