Намнааҕы педагогическэй кэллиэс истиэнэтигэр алтынньы 16-17 күннэригэр устудьуоннарга улахан күрэх тэрилиннэ.
Манна 22 идэҕэ үөрэтэр тэрилтэлэртэн икки сүүсчэ устудьуон күөн көрүстэ. Кинилэр уон тус бэйэлэринэн уонна биэс хамаанданан категорияларга күрэхтэстилэр, ол курдук «Сыл идэлээҕэ (Профессионал года)» уонна «Сыл түмсүүтэ (Клуб года)» ааттары былдьастылар.
Икки күннээх тыҥааһыннаах киирсиилэргэ бэйэлэрин кыахтарын, талааннарын киэҥ эйгэҕэ, саастыылаахтарыгар көрдөрдүлэр, саҥа бырайыактарын билиһиннэрдилэр, уопуттарынан, араас көрүүлэринэн атастастылар.
Бу суолталаах күрэххэ биһиги биир дойдулаахпыт, Сиэн Күөл кэскиллээх ыччата, Намнааҕы педагогическай кэллиэс үһүс кууруһун устудьуона Ксения Винокурова үрдүк наҕараадаҕа тигистэ — Гран-при хаһаайына буолла.
Маны тэҥэ, «Айар талаан (Творческая личность года)» категория кыайыылааҕа буолан барыбытын үөртэ-көтүттэ.
Ксенияны улахан ситиһиитинэн истиҥник эҕэрдэлиибит! Улахан түһүлгэҕэ улууспут аатын дорҕоонноохтук ааттаппыккынан киэн туттабыт. Саҥа саҕахтар арыллан истиннэр, идэлээх үлэһит буолан, дойдугун ааттата тур.
Ааптар Светлана Третьякова