Николай Иванович Шарин аатын сүгэр Орто Халыматааҕы орто оскуола быйылгы үөрэх дьылын 415 үөрэнээччилээх көрүстэ.
Үөрэх сыла, саҥа дириэктэр Максим Петрович Бурнашев салайыытынан саҕаланна.
Алтынньы 2 күнүгэр биһиги оскуолабытыгар Алтынньытааҕы учууталлар мунньахтара ыытыллыбыта. Манна куорат уонна Налимскай орто оскуолатын үөрэх тэрилтэлэрэ кыттыыны ылбыттара.
Мунньах, оҕо уһуйааннарын сэбиэдиссэйдэригэр, оскуола дириэктэрдэригэр, солбуйааччыларыгар, завучтарга, исписэлиистэргэ тус туһунан аттарыллан ыытыллыбыта.
Сүбэ мунньахха тэрилтэ салайааччылара саҥа сыал-сорук ылыннылар, быйылгы үөрэх дьылын сүрүн хайысхаларын торумнаатылар.
Күн чэрчитинэн үөрүүлээх быһыыга-майгыга үлэ бастыҥнарыгар наҕараадалар, бочуоттаах кырааматалар туттарыллыбыттара.
Субуота күн, 10-11 кылаас үөрэнээччилэрэ, үгэс курдук, бэйэни салайыныы күнүгэр, учууталлары солбуйдулар. Оҕолор бары олус эппиэтинэстээхтик сыһыаннастылар, үгүстэрэ учуутал үлэтин сыаналаатылар, учуутал буолар баҕа санаалаахтарын биллэрдилэр👏🏽
Учуутал күнүгэр, ытык бэтэрээннэрбит кыттыылаах Бырааһынньыктааҕы Линейка буолан ааста. Үөрэнээччилэр, быйылгы выпускниктар Эҕэрдэлэрин истэн-көрөн төрөппүттэр махталларын тутан олус үөрдүбүт.
Үтүөҕэ кэрэҕэ сирдиир, уһуйар-иитэр аналлаах Учууталларга ситиһиини, үтүө түмүктэрдээх айымньылаах үлэни, үчүгэй үөрэнээччилэри, махталлаах төрөппүттэри, тус олохторугар дьолу, саргыны, кэскили баҕарабыт.
Ааптар Саргылана Кокорина