Кыайыы күнүн көрсө Налимскай орто оскуолатыгар «Зарница» байыаннай-спортивнай оонньуу тэрилиннэ. Оҕолор 3 хамаандаҕа: «Мохсоҕол» (хамандыыр Костя Павлов), «Сокол» (хамандыыр Ньургун Созонов) уонна «Адреналин» (хамандыыр Андриан Третьяков) арахсан күрэхтэстибит. Хамаандалар бэлэмнэнэн, тэринэн, урукку сөмөлүөт түһэр пуордугар хомуллан, араас түһүмэхтэргэ күөн көрүстүбүт.
Ол курдук, түһүмэхтэринэн, үрүсээк иһигэр сөптөөх мал баарын бэрэбиэркэлээтилэр, салгыы разведкаҕа тыаһа суох сылдьыы, хомурах хаарынан сүүрүү буолбута. Бу күрэхтэргэ «Мохсоҕоллор» инники түһэммит үөрүүбүт үксээбитэ. Онтон туһаҕы сөпкө иитии түһүмэҕэр «Сокол» хамаандата иннин биэрбэтэ.
Салгыы сыал ытыы, миинэлэри көрдөөһүн, туут хайыһарынан сүүрүү, ханаатынан тардыһыы түһүмэхтэрэ бэрт эрийсиилээхтик аастылар. Бүтэһик түһүмэх чэй оргутуу, миин буһарыы буолбута. Зарницабыт сыһыыга тэриллэн, сааскы сылаас күн үөрэ-көтө оонньоон кэллибит, дуоһуйа сынньанныбыт. Оонньуубутун тэрийэн ыыппыт, илдьэ сылдьыбыт оскуола иитэр үлэҕэ салайааччытыгар В.В Еремееваҕа, физкультура уонна ОБЖ учууталыгар Е.А Слепцовка, дириэктэр сүбэһитигэр А.С. Винокуроваҕа уонна кылаас салайааччыларыгар махталбытын тиэрдэбит.
Ильина Настя, Налимскай орто
оскуолатын 9-с кылааһын үөрэнээччитэ
Ыам ыйын 1, 9 күннэрэ — Yлэ, Эйэ, Кыайыы өрөгөйдөөх бырааһынньыктар ыытыллар күннэрэ. Биһиги, Налимскай орто оскуолатын үөрэнээччилэрэ, учууталлара бу үөрүүлээх күннэри ыраастык, чиэстээхтик көрсөр сыалтан, бөһүөлэкпит уулуссаларын хомуйар субуотунньуктарыга кытынныбыт. Олус үчүгэйдик үөрэ-көтө, сүргэбит көтөҕүллэн үлэлээтибит, үтүө дьыала хамсааһыныгар кыттыстыбыт диэн астынабыт.
Күннэй Дьячкова, Налимскай
орто оскуолатын
9-с кылааһын үөрэнээччитэ