Биир дойдулаахпыт, улахан учуонай, уопсастыбаннай диэйэтэл, өрөспүүбүлүкэтээҕи Ытык Сүбэ чилиэнэ Ульяна Алексеевна Винокурова дойдутугар кэлэн, өрүү дьонун-сэргэтин кытта көрсөн-билсэн барааччы. Кини куорат бэтэрээннэрин уонна кырдьаҕастары чөлүгэр түһэрэр Киин үлэһиттэрин, онно баар дьону кытта көрсүһэн, чуолаан улууспутугар ытык көлүөнэ дьон уонна инбэлииттэр тустарыгар аналлаах тирээн турар, итини тэҥэ кэскиллээх туһаайыыларгар бэйэтин көрүүлэрин атастаста.
Ульяна Алексеевна кырдь- аҕастар тыыннаах айылҕаҕа сылдьан сынньаналларын кэлимник тэрийии уо.д.а. туһунан Ил Түмэн анал кэмитиэттэригэр, туһааннаах депутаттарга уонна министиэристибэлэргэ тиийэ этии киллэрэн, барылы оҥорорго үлэлэһэрин сэргии иһиттибит. Көрсүһүүгэ бэтэрээннэр кэпсэтиигэ сөптөөхтүк уонна дьыалабыайдык кытыннылар. Халыма Эбэбит сүнньүгэр баар «Маяк» учаастакка кырдьаҕастар сынньанар, айар-тутар баазаларын тэрийии, реабилитациялыыр Кииҥҥэ улахан өрөмүөнү былааннаахтык ыытыыны туруорустулар. Ону тэҥэ олохтоох тэлэбиидьэнньэ уонна араадьыйа үлэтин сөргү- түү, улууска улахан күүстээх уопсастыбаннай тэрилтэ —бэтэрээннэр Сэбиэттэрин үлэтигэр киирбит этиилэри үөрэтии уо.д.а. боппуруостарга санааларын атастастылар.
Итини тэҥэ дойдубут билиҥҥи уустук балаһыанньатын — анал байыаннай дьайыы туһунан кэпсэтии биллэн турар эмиэ буолла.
Манна улуус нэһилиэнньэтэ социальнай көмүскэллээх буоларыгар аналлаах биир кэлим Киин саҥа салайааччыта Любовь Оконешникова, улуустааҕы дьиэ кэргэн бэлиитикэтин сүрүн исписэлииһэ Светлана Третьякова, улуус уопсастыбаннай Сэбиэтин бэрэссэдээтэлэ Любовь Суслонова уонна улуустааҕы бэтэрээннэр Сэбиэттэрин бэрэссэдээтэлэ Анна Волкова тустаах үлэлэригэр сыһыаннаах боппуруостары тула кэпсэттилэр.
Түмүккэ, бу икки суолталаах көрсүһүүлэргэ сылдьыбыт дьон Ульяна Алексеевна Винокуроваҕа улаханнык махтанан, киниэхэ туйгун туругу, араас өрүттээх үлэтигэр өссө ситиһиини, табыллыыны, дьолу баҕардылар.
Акулина Колесова.