2023 сыл бары билэрбит курдук, Саха Өрөспүүбүлүкэтигэр Үлэ сылынан биллэриллибитэ. Тыа хаһаайыстыбатын үлэһиттэрин сыралаах-сылаалаах үлэлэрин бэлиэтиир, аналлаах күннэрин алтынньыга үтүө үгэс курдук ылабыт. Ол курдук, быйыл Бастакы Хаҥалас нэһилиэгэр алтынньы 13 күнүгэр олохтоох «Күөрэгэй» КЭК-ҥэ бэрт үчүгэй тэрээһиннээх дьоро киэһэ буолан ааста.
Үлэ бастыҥнарыгар, эдэр сылгыһыкка Иннокентий Михайлович Винокуровка уонна ветеринария үлэһитигэр Василий Петрович Третьяковка Тыа хаһаайыстыбатын министиэристибэтиттэн, кэтэх хаһаайыстыбалаах үүт туттарааччыларга Василий Алексеевич Третьяковка, Миланья Егоровна Созоноваҕа, Михаил Михайлович Винокуровка улуустааҕы тыа хаһаайыстыбатын салалтатыттан добун суруктар туттарылыннылар.
Олохтоох сылгы Собуотун салайааччыта К.Н. Винокуров үбүлүөйдээх бэтэрээн үлэһиттэригэр эҕэрдэ суруктары кытта убаһанан бэлэҕэ дохсун ытыс тыаһынан доҕуһуолланна. Бу кэннэ, сонун сүүрээн буолбут, «смс» куоластааһын нөҥүө ыытыллыбыт «Үлэ киһитэ» куонкурус түмүгүн иһитиннэрдэ. Ол курдук, сылгы Собуотун үлэһиттэриттэн саамай элбэх куолаһы ылан, Үлэ сылыгар «Үлэ киһитэ» үрдүк ааты ылла –Владимир Петрович Третьяков. Кини 2007 сылтан ыла сылгы Собуотун солбуллубат тырахтарыыһа буолар. Владимирга 508 киһи куолаһын биэриитэ, кини эҥкилэ суох үлэһитин дакаастыыр. Онон, Владимир Петрович кыайыылаах буолан, лиэнтэ кэттэ уонна матассыыкылынан наҕараадаланна.
Бары тыа хаһаайыстыбатын үлэһиттэригэр анаан оскуола оҕолорун, олохтоохтору, «Аргыс» драм-кэлэктиип түмэн, «Күөрэгэй» КЭК бэртээхэй эҕэрдэ кэнсиэри туруорда.
Салгыы дьоро киэһэ саамай долгутуулаах кэминэн, киирии билиэтинэн, лотерея оонньуута буолла. Манна сүрүн сүүйүүнэн — 2023 сыллааҕы төрүөх оҕус этэ. Улахан сүүйүүттэн ураты өссө 20 сыаналаах мал оонньонно. Оҕус сүүйүүнү тарбаҕар бартыаннаах Мария Герасимовна Никифорова ылан, үөрүүтэ үрдээтэ. Атын да сүүйүүлэргэ тиксибиттэр олус үөрэн-көтөн, бу дьоро киэһэни тэрийээччилэргэ махтанан туран, астыммыттарын биллэрдилэр.
Маннык түмсүүлээх, долгутулаах, тэрээһиннээх дьоро киэһэлэр ыытыллаллара олус үчүгэй. Нэһилиэк түмсэр, сомоҕолоһор, сэргэхсийэр. Өссө төгүл сынньалаҥы аахсыбакка үрүҥ илгэни үрүлүтэр, тымныыттан-куйаастан толлубакка тимир көлөнү буоһалыыр, хороҕор муостааҕы хотуулаахтык иитэр, сыспай сиэллээҕи сырыырҕатар үлэһит дьоммутун идэлээх күннэринэн эҕэрдэлиибит, сыралаах үлэлэригэр махтанабыт.
Ааптар: Изабелла Ноговицына, Өлөөкө Күөл бөһ.
Фото: Владимир Третьяков матассыыкылынан наҕараадаланна / ааптар: Иван Винокуров