Ахсынньы 14 күнүгэр «Кулума» култуура киинигэр улуустааҕы тыа хаһаайыстыбатын управлениетын салалтата 30 сыллаах үбүлүөйүн бэ-лиэтээтэ.
Устуоруйа кэпсииринэн, өрөспүүбүлүкэ улуустарыгар, тыа хаһаайыстыбатын управлениялара, Саха Өрөспүүбүлүкэтин тыа хаһаайыстыбатын министиэристибэтин бирикээһинэн 1994 сыллаахха бэс ыйын 18 күнүгэр төрүттэммиттэрэ.
Орто Халыма улууһун бастакы начаалынньыгынан М.Н.Винокуров анаммыта.Тэрилтэни 1999 сыллаахтан А.Д.Слепцов, 2003с. — И.Г.Чукров, 2005 с. — М.И.Явловскай салайан, улууска тыа хаһаайыстыбата таһымын түһэрбэккэ сайдарыгар дириҥ кылааттарын уурбуттара, саҥаттан саҥа сүүрээннэри киллэрэн, тыа хаһаайыстыбата кэскиллэнэрин туһугар төһүү күүстэрин, тустаах сыраларын анаабыттара. 2012 сыллаахха тыа хаһаайыстыбатын управлениета муниципальнай хааһынай тэрилтэ буолбута, ол сыл салайааччынан Е.Н. Константинов анаммыта. Кини 2018 сыллаахха диэри, үгүс уларыйыы-тэлэрийии кэмигэр, хаардаах-уулаах дьылларга сайдыы тэтимин ыһыктыбатын туһугар элбэх үлэ ыыппыта. Кини салалтатын кэмигэр Граннарга киирсии, араас бырагыраамаларынан тиэхиньикэ ылыы, дьиэ, хотон тутуу бырайыактара олоххо киирэн барбыттара.
Кэлин тыа хаһаайыстыбатын улуустааҕы управлениетыгар Г.Н. Кострамыкин, Е.П.Созонов, А.Д.Третьяков кылгас кэмҥэ үлэлээн ааспыттара. 2007 сыллаахтан СӨ бырабыыталыстыбатын уурааҕынан улуус нэһилиэктэригэр исписэлиистэр дуоһунастара киирэллэрэ бигэргэммитэ.
Онтон ыла бу күн тыа хаһаайыстыбатын управлениета 15 үлэһиттээх, салайааччынан Д.Н.Винокуров, салайааччы солбуйааччытынан М.А.Шарина, сүрүн буҕаалтыр А.Н.Вирячева, кылаабынай зоотехник А.Н. Слепцова уонна Р.Р.Явловская, салайар экэнэмиис Г.В. Бандерова, суоппар А.Д.Винокуров уонна нэһилиэк аайы тыа хаһаайыстыбатын исписэлииһэ үлэлиир.
Бэлиэ кэм дьоро киэһэтигэр ааспыт сылларга үлэлээбит уонна үлэлии сылдьар салалта исписэлиистэригэр уонна салайааччыларыгар Бочуоттаах кырааматалар уонна Махтал суруктар туттарылыннылар.
Ол курдук, үрдүк наҕараадалартан бэлиэтиир буоллахха, СӨ Ил Түмэн судаарыстыбаннай мунньаҕын олохтоох кэмитиэтин Бочуоттаах кыраамататынан үлэ бэтэрээнэ, СӨ тыатын хаһаайыстыбатын туйгуна, Алаһыай нэһилиэгин Бочуоттаах олохтооҕо П.А.Третьяков уонна СӨ агропромышленнай комплексын Бочуоттаах үлэһитэ И.Г.Чукров наҕараадаланнылар. Кэмитиэт Махтал суруктара Норуот хаһаайыстыбатын үтүөлээх үлэһитигэр, Иккис Хаҥалас нэһилиэгин Бочуоттаах олохтооҕор А.Д.Слепцовка уонна СӨ тыатын хаһаайыстыбатын туйгунугар, судаарыстыбаннай сулууспа бастакы референыгар М.И.Явлов-скайга тутарылынна.
Билигин да идэтигэр бэриниилээхтик үлэлии сылдьар, үрдүк стажтаах үлэһиккэ «СӨ агропромышленнай комплексын Бочуоттаах үлэһитэ» аат улуустааҕы тыа хаһаайыстыбатын начаалынньыгын солбуйааччытыгар, СӨ тыатын хаһаайыстыбатын туйгунугар, үлэ бэтэрээнигэр М.А.Шаринаҕа иҥэрилиннэ. Маны сэргэ Аартыка уонна СӨ Хотугу норуоттарын дьыалаларын сайдыытын министиэристибэтин, СӨ тыатын хаһаайыстыбатын министиэристибэтин уонна Орто Халыма улууһун дьаһалтатын аатыттан Бочуоттаах кырааматалары уонна Махтал суруктары араас кэмҥэ үлэлээн, кылааттарын киллэрсибит исписэлиистэргэ улуус баһылыгын бастакы солбуйааччыта П.И.Антипин туттарда.
«Орто Халыма улууһун сайдыытыгар кылаатын иһин» бэлиэ, салалтаҕа өр кэмҥэ үлэлээбит, улуустааҕы тыа хаһаайыстыбатын управлениетын кылаабынай зоотехнигар А.Н.Слепцоваҕа туттарылынна.
Улуустааҕы тыа хаһаайыстыбатын управлениетын салайааччыта Д.Н.Винокуров үлэ бэтэрээннэрин, дьоро киэһэ кыттыылаахтарын, бары үлэһиттэри, исписэлиистэри бэлиэ сылынан эҕэрдэлээтэ. Дойдуларыгар бэриниилээх, тулуурдаах, дьулуурдаах, инникини кэскиллиир баҕалаах, күүстээх санаалаах дьон баар буоланнар, бу күҥҥэ диэри улууска ынах сүөһү, сыспай сиэллээх, түргэнник ситэр салаа тутуллан турар диэн бэлиэтээтэ, бары үлэһиттэргэ, үлэ бэтэрээннэригэр махтанна, управление исписэлиистэригэр Махтал суруктары туттарда.
РФ Агропромышленнай комплексын үлэһиттэрин профсойууһун аатыттан, М.А.Шарина, Е.Н.Константиновка, Н.Г.Березкинаҕа, А.А.Васильеваҕа, А.В.Кудриҥҥа Бочуоттаах кырааматалары туттарда, итиэннэ бу күн төрөөбүт күннэрин бэлиэтиир дьоҥҥо, Н.Г.Березкинаҕа уонна В.Д.Слепцовка анал бэлэхтэри туттаран эҕэрдэлээтэ.
Дьоро киэһэҕэ Орто Халыма улууһун нэһилиэктэрин дьонун-сэргэтин, олоҕун-дьаһаҕын, хаһаайыстыбалар сайдыыларын көрдөрөр-кэпсиир видеороликтар көһүннүлэр. Ааспыт кэм салайааччыларын А.Д.Слепцов (1999-2003сс.), И.Г.Чукров (2003-2005сс.), М.И. Явловскай (2005-2011сс.) ахтыылара ааҕылынна. Бастакы уонна Иккис Хаҥаластан, Сиэн Күөлүттэн эҕэрдэ нүөмэрдэр киэргэттилэр. Биэчэр, улуус нэһилиэктэрин баһылыктарын эҕэрдэлэринэн уонна уопсай хаартыскаҕа түһүүнэн түмүктэннэ.
Маны сэргэ ахсынньы 16 күнүгэр, Сиэн күөл нэһилиэгин олохтоохторо улуустааҕы тыа хаһаайыстыбатын 30 сылыгар аналлаах эҕэрдэ кэнсиэр бэлэх ууннулар. Кэнсиэр «Кулума» култуура киинигэр, саалаҕа толору көрөөччүлээх үрдүк таһымҥа ыытылынна.
Улуустааҕы тыа хаһаайыстыбатын управлениетын урукку уонна билиҥҥи кэлэктииптэрин, салалта бэтэрээннэрин, үбүлүөйдээх кэрэ-бэлиэ сылынан итиитик-истиҥник эҕэрдэлиибит! Дьоһуннаах дьаһалгытынан бары соруккут туолан, былааннаргыт кэмигэр олоххо киирэллэригэр баҕарабыт.
Ааптар: Саргылана Кокорина
Хаартыска: Алена Кокорина