Күн уһаан, халлаан сылыйан, кулун тутар ыйга үктэннибит. Бу кэми, ордук, сүөһү ииттэр тыа хаһаайыстыбалаах үлэ дьоно «Кыстыгы этэҥҥэ аһаран эрэбит», — диэн өрө тыына көрсөллөр. Ол эрэн, кыһынын эрэ суоллаах -иистээх дойдулаах дьон буоларбытынан, тиэйэр- таһар кэми тутуспахтаан эрэ хааллахха, кэлэр кыстыгы бэлэмнээх көрсөр кыах баар буолар.
Улууспут биир үлэһит, удьуорунан утумнанан хаһаайыстыба тутар дьон, Иккис Хаҥалас нэһилиэгин Слепцовтара, сайын оттуур былааннарын номнуо оҥостон, бэлэмнэнии үөһүгэр сылдьаллар. Бу күннэргэ биир өрөгөй ситиһиилэрэ олоххо киирэн, аныгылыы оту түүрэр тиэхиньикэлэрэ кэлэн, үөрэн өрө көтөҕүллэн олороллор.
Үтүө хамсааһын туһунан тыа хаһаайыстыбатын исписэлииһэ Владимир Слепцов кэпсиир: «Кыстыкпыт этэҥҥэ ааһан эрэр . Бөһүөлэккэ бу дьыл уопсайа 34 ыанар ынахтан 12 -тэ төрөөн турар. Бу күннэргэ убайбыт урбаанньыт Тимофей Дмитриевич Слепцов көмөтүнэн оту рулуоннуу түүрэр тиэхиньикэлэри аҕалынныбыт. Ол курдук мин 200 киилэҕэ диэри бүүрэр, убайым Алексей Слепцов 50 киилэни рулуоннуур тиэхиньикэлэрбит кэллилэр. Бырааппыт Егор Слепцов ылыммыт тиэхиньикэтэ Дьокуускай куоракка ылыллан турар, сотору кэлиэҕэ. Онон сүөһү ииттэр баҕа, төһө кыах баарынан баар, былаан элбэх».