Бэлиэ күммүтүнэн ытык бэтэрээннэрбитин, уопсастыбаннай кэрэспэдьиэннэрбитин, эрэллээх ааҕааччыларбытын, ыраах-чугас баар сурутааччыларбытын итиитик-истиҥник эҕэрдэлиибит!
СӨ «Сахабэчээт» судаарыстыбаннай тэрилтэтин салайыытынан, өрөспүүбүлүкэбит бырабыыталыстыбатын өйөбүлүнэн, эрэдээксийэ бу күҥҥэ диэри, куйаар олох үйэтигэр, кумааҕы хаһыата уостубакка-сүппэккэ нэдиэлэ ахсын тахсар.
Ааҕааччыларбыт, эһиги баар буолаҥҥыт, сурук-бичик суруллар, сонун баар чахчынан кэпсэнэр, эрэдээксиэйбит дьону-сэргэни үөрдээри, сайдыыны-ситиһиини сырдатаары, аныгы олох ирдэбилинэн, үгүс ньыманы баһылаан, куйаар нөҥүө ханааллары сөргүтэн үлэлиир-хамсыыр, араас өҥөлөрү толорор. Бу күн кумааҕынан да, интэриниэт ситиминэн ааҕааччы үксүүрэ биһигини үөрдэр, айарбытыгар-тутарбытыгар, саҥаттан саҥаны тобуларбытыгар тирэх буолар.
Саҥа сылы Телеграм ханаалбыт 1000-тан тахса подписчиктаах көрсүбүтэ элбэҕи быһаарар, инникигэ кынаттыыр.
Бу күн туругунан, үүммүт сылы хаһыаты тутан ааҕар 344 сурутааччылаах, Whatsapp ханаалыгар 362, Телеграмм ханаалыгар 1015 ааҕааччылаах көрүстүбүт. Маны сэргэ сонуннарбыт ULUSMEDIA сайпытыгар күннэтэ тахсаллар.
Эрэдээксийэ типографиятыгар хаартыска оҥоруу өҥөтө күннэтэ оҥоһуллар, халандаар, сурунаал, кинигэ, уо.д.а таһаарыыга элбэх сайаапка киирэр. Кинигэ оҥорууга сыл аҥаардааҕы былаан туолан турар. Сотору кэминэн кырдьаҕас куораппыт үбүлүөйүгэр аналлаах хаартысканан кэпсэнэр сурунаалбыт күн сирин көрүөҕэ.
Үүммүт сылы Дойдубут Бэрэсэдьиэнэ Дьиэ кэргэн, өрөспүүбүлүкэбит Ил Дархана Оҕо саас, улууспутугар Үөрэхтээһин сыла биллэһиллибитинэн, сыллааҕы былааммыт сүрүн хайысхата бу уураахтарга туһаайыллыаҕа.
Онон Өрөспүүбүлүкэ бары муннугар биһигинниин олох үөһүгэр сылдьар хас биирдии сурутааччыбытыгар, уопсастыбаннай кэрэспэдьиэннэрбитигэр, көмө-тирэх буолар, ыстатыйа ыытар суруйар-бичийэр дьоммутугар, олохтоох дьаһалталар исписэлиистэригэр, өрүү алтыһар тэрилтэлэрбит салайааччыларыгар истиҥ махталбытын биллэрэбит. Барыгытыгар чэгиэн-чэбдик доруобуйаны, дьиэ кэргэҥҥитигэр дьолу-соргуну, ил эйэлээх олоҕу, таһаарыылаах үөрэҕи-үлэни, ылсыбыт былааҥҥыт үөрүүнү кытта олоххо киирэригэр баҕарабыт.
Ааптар: Сүрүннүүр эрэдээктэр Саргылана Кокорина