Сэтинньи 10 күнүгэр Саха сирин бастыҥ учууталлара Бастыҥ бириэмийэнэн наҕараадаланнылар. Бу бириэмийэҕэ биһиги улууспутуттан Н.И.Шарин аатынан Орто Халыматааҕы орто оскуола алын кылаас учуутала Айыына Егоровна Сибирякова ааттанна. Бастыҥ учуутал 100 тыһ.наҕараадаланна. Үрдүк ситиһиигэ тиксиитин туһунан эдэр кэскиллээх учуутал бу курдук сэһэргиир:
Уһуйааччы уонна аҕа сүбэһит сылынан Саха Өрөспүүбүлүкэтин үрдүнэн 100 бириэмийэ олохтонно. Ол бириэмийэҕэ оскуола иннинээҕи саастаах оҕолор иитээччилэрэ, оскуола уһуйааччылара, эбии үөрэхтээһин эйгэтин үлэһиттэрэ портфолио нөҥүө кэтэхтэн үлэлиир тэрилтэлэр мэктиэлээһиннэринэн кыайыылаахтар анал хамыыһыйаны ааһан талыллан киирдилэр.
Бу бириэмийэҕэ Орто Халыма улууһуттан мин тигистим. Билигин ДьХИФУ үһүс кууруска үөрэнэр сиэссийэм кэмэ түбэһэн, наҕараадабын бэйэм ылар чиэскэ тиксибитим олус долгутуулаах, дьоллоох түгэн буолла. Бу олохпор биир бэлиэ умнуллубат түгэнинэн буолар, онон үлэбэр эппиэтинэһим өссө бүк төгүл үрдээтэ дии саныыбын.
Куруук ханна да буолларбын үтүө сүбэһит, тирэх буолар төрөппүттэрбэр, кэрэҕэ үтүөҕэ үөрэппит, билии киэҥ аартыгар угуйбут «Чэчир» уһуйаан иитээччилэригэр, Хатыҥнаах уонна Г.Г.Колесов аатынан Сыбаатай орто оскуолатын учууталларыгар, анал идэни баһылыырбар маҥнайгы билиигэ олук уурбут Намнааҕы Педагогическай Колледж педагогтарыгар, Н.И.Шарин аатынан Орто Халыма орто оскуолатын бииргэ үлэлиир кэлэктииппэр, чуолаан кэлэктииппитин биир сомоҕо түмэр, салайар дьоҕурдаах, кэрэни кэрэһэлиир, үтүөнү түстүүр,сайдыы суолун арыйар ураты көрүүлээх дириэктэрбитигэр Колымана Александровна Слепцоваҕа, оскуола үөрэхтээһинин салайар учууталларга Туйаара Владимировнаҕа, Мария Васильевнаҕа, Лена Александровнаҕа, Нина Николаевнаҕа, Алена Николаевнаҕа, настаабынньыктарбар Анна Егоровна Оконешниковаҕа, Екатерина Иннокентьевна Софроноваҕа уонна үөрүүбүн үллэстибит бар дьоммор истиҥ махталбын тиэрдэбин.
Күндү иитэр-үөрэтэр аналлаах кэллиэгэлэрбэр, сыралаах үлэҕит түмүгэ сыаналана турарыгар, төрөппүттэр махталлара үрдүккэ кынаттыырыгар, барыгытыгар саха алмааһыныы кытаанах доруобуйаны, тус олоххутугар дьолу, күн сиригэр баар бары үчүгэйи баҕарабын. Күн аайы чахчыны, саҥаны көрдөөн, үөрэнээччилэрбитигэр саҥа билии биэрэр туһугар туруулаһа туруохха.
Ааптар: Саргылана Кокорина
Хаартыска: Бириэмийэни туттарыы түгэниттэн