Айыылартан айдарыылаах айылҕалаах дьон баар буолар. Оннук дьону айыыһыт, дьоҥҥо- сэргэҕэ, ыччакка, тулалыыр эйгэҕэ тапталы, баары хайгыырга, харыстыырга иитэр-үөрэтэр, тарҕатар аналы иҥэрэн ыытар. Маннык айылгылаах дьон биһиги аттыбытыгар ахсааннаах. Кинилэртэн биирдэстэринэн билинэр ытык киһибит Татьяна Николаевна Лаптева- Утумнаах буолар. Кини кинигэтэ кииннэммит бибилэтиэкэҕэ сүрэхтэннэ.
«Ис дууһам иэйиитин бар дьоммор аныыбын» кинигэ ааспыт сылга «Халыма долгуннара» хаһыат эрэдээксийэтин типографиятыгар 50 эксэмпилээринэн бэчээттэнэн тахсыбыта. Кинигэҕэ, «Мин хоһооннорум», «Төрөөбүт алааһым ахтылҕана», «Халымабын хайгыы, сөҕө көрөбүн», «Бар дьоммор алгыспын аныыбын» түһүмэхтэргэ олоҕуран, 123 айымньы хоһуллан киирбит.
Дьоро биэчэр кииннэммит бибилэтиэкэ исписэлиистэрэ Туйаара Кудрина, Анастасия Еремеева салайыыларынан ыытылынна.
Үтүө тэрээһиҥҥэ Татьяна Николаевна биир үөлээннээхтэрэ, доҕотторо, дьүөгэлэрэ, дьиэ кэргэнэ, аймахтара, айар куттаах дьон кыттыыны ыллылар.
Үгүс ыалдьыт эҕэрдэ тыл эттэ, кинигэттэн сөбүлээбит хоһоонун аахта, айымньылары ырытта, санаатын үллэһиннэ. Хас биирдии киһи уйулҕатыгар чэпчэкитик киирэр төрүт тыллардаах хоһооннорго айылҕаҕа таптал, тулалыыр эйгэҕэ махтал, төрөөбүт алааска сүгүрүйүү, дьиэ кэргэнинэн киэн туттуу, идэлээх дьоҥҥо хайҕал, сүмэлээх сүбэлэр киирбиттэрин кэлбит дьон сэргээн бэлиэтээтэ.
Кинигэ ааптара Татьяна Лаптева- Утумнаах, дьоҥҥо- сэргэҕэ анаабыт алгыс хоһоонунан түмүктээтэ, кинигэтин сүрэхтэниитэ, үөрүүтүн тэҥҥэ үллэстибит дьон көмөтүнэн үрдүк таһымнаахтык ыытыллыбытынан истиҥ махталын биллэрдэ. Татьяна Николаевна дьон биһирэбилин ылбыт, күн сирин көрбүт кинигэтинэн кынаттанан, салҕыы айыа-тутуо, сүмэлээх айымньылары өссө даҕаны таһаарыа диэн эрэнэбит.
Ааптар: Саргылана Кокорина