Муус устар 11 күнүттэн өрөспүүбүлүкэ үрдүнэн, киинэ көрдөрөр тыйаатырдарга «Карина» киинэ көстүүтэ саҕаланна. Киинэ премьерата биһиги улууспутугар, Орто Халымаҕа, муус устар 14 күнүгэр көһүннэ. Бастакы күн 125 билиэт атыыланна. Дьон үксэ дьиэ кэргэнинэн, оҕолорун кытта кэлэн көрдүлэр.
Киинэ бүтүүтэ, көрөөччү саалаттан чуумпутук долгуйан таҕыста, ол аата киинэ хас биирдиибит дууһатын таарыйбыт…
Бу олоххо чахчы, буолбут быһылаантан таҥыллан оҥоһуллубут киинэ буолан, киһиэхэ өссө долгутуулаахтык бэрилиннэ. Хас биирдиибит өйдүүр буолуохтаахпыт, 10 сыллааҕыта, 4 саастаах оҕо аһаҕас халлаан анныгар мунан, 12-с хонугар тыыннааҕын булбуттарын. Тус бэйэм, оччолорго, НКИХ «Саха» ханаалыгар чоҕулуччу көрбүт төгүрүк харахтардаах кыыс оҕо от быыһыгар саһан олорорун өйдүүбүн.
Чуолаан, кыыс оҕолордоох ийэлэр долгуйбуттар. Оҕолорун Карина оннугар ойуулаан көрбүттэр: «Олус үчүгэй киинэни көрдүбүт. Киһи бэйэтин оҕотун, арай маннык балаһыанньаҕа түбэспит эбит диэтэххэ, хайдах да киһи өйүгэр батарбат дьулаан санаа кууһар. 4 саастаах оҕо, 12 хонук, күн киирэр сайыннаах дойдуга… улахан да киһи тулуйуо суох курдук. Карина, тыа сирин олоҕор, ыарахан усулуобуйаҕа үөрүйэх оҕо буолан тулуйсан, тыыннаах хааллаҕа. Иккиһинэн, ыта баар буолан, тыына уһаата, ыт-киһи доҕоро буоларын өссө биирдэ итэҕэйдибит уонна тыа оҕото айылҕатыгар чугаһа көһүннэ. Артыыстар бары, Каринаны оонньообут кыыс оҕо, олус үчүгэйдик итэҕэтиилээхтик толорбуттар. Бүгүн тыйаатырга хаһааҥҥытааҕар да элбэх киһи сырытта», — диэн санааларын эттилэр.
Иван Бережнов, Халыматааҕы көрдүүр-быыһыыр этэрээт быыһааччыта: «2014 сыллаахха, мин көрдүүр-быыһыыр этэрээккэ саҥа үлэлии киирбит сылым этэ. Ол саҕана өрөспүүбүлүкэ үрдүнэн, оҕо сүппүтүн туһунан тыллабыр киирэн, биһиги этэрээппититтэн икки киһи барарга бэлэмнэммитэ. Оччолорго өрөспүүбүлүкэ үрдүнэн баһаар бөҕө турбута. Киинэ бэйэбит үлэбитигэр сыһыаннаах, олоххо чахчы буолбут быһылаан буолан, олус дириҥник ылынан, долгуйа көрдүм. Артыыстар бары олус үчүгэйдик, итэҕэтиилээхтик толорбуттар, чуолаан кыыс оҕо, ытыыра, хас биирдии төрөппүт сүрэҕин таарыйбыта буолуо. Киинэҕэ этэрээккэ чахчы үлэлээбит дьон ааттара, фамилиялара киирбит, бэл кинилэр куоластарынан саҥарар курдуктар. Бу быһылаан түмүгүн биллэрбит да, хас биирдии хартыынатыгар долгуйа олордубут. Көрдүүр кэм болдьоҕо 10 суукка бэриллэрэ чахчы (активная фаза поиска), ону этэрээт старшайа бэйэтигэр эппиэтинэс ылынан, көрдүүргэ өссө икки күн уһатар. Ситиһиилээх үлэ түмүгүнэн, оҕо көстүбүтэ. Маннык, үлэ ыытыллара хамандыыр салайыытыттан олус тутулуктаах».
Бу курдук дьон саҥа тахсыбыт киинэттэн олус долгуйбутун, сөбүлээбитин иһиттибит. Киинэ Орто Халымаҕа «Кулума» култура киинигэр, муус устар 25 күнүгэр диэри көстүөҕэ. Буолар күнэ култуура киинин интэриниэт афишатыгар тахсыаҕа.
Ааптар: Саргылана Кокорина