Саха дьоно ыһыах ыһарыгар Үрдүк айыыларга, иччилэргэ анаан алгыс түһэрэр кэмигэр үс дойду хара дьайдаах өттүн бүөлүүргэ Аар баҕаҕы, сэргэлэри, чэчири кытта ситимнээн, холбуу баайан харысхал быһыытынан туһанара.
Салама олоххо-дьаһахха, күннэтэ кэриэтэ толоруллар сиэргэ-туомҥа булгуччу туттуллара. Ол курдук ыраах айаҥҥа барбыт киһи суол тоҕойдоругар турар маска айана-сырыыта этэҥҥэ ааһарыгар көрдөһөн ыйыыр ыйаан хаалларара.
Былыр сайылыкка көһөллөрүгэр өлгөм үүнүүлээх, үрдүк быйаҥнаах сайын, дьиэ кэргэн дьоно чэгиэн-чэбдик туруктаах буолалларыгар уонна сүөһүлэрэ сайыны этэҥҥэ туорууругар аар хатыҥҥа ыйыыр ыйаан сир-дойду иччилэриттэн көрдөһөрө.
Самаан сайыны уруйдуур Үрүҥ Тунах Ыһыахха Дьөһөгөй оҕото барахсаны маанылыылларын, убаастыылларын көрдөрөн сэргэлэри саламанан киэргэтэллэрэ. Саламанан сэргэлэри тиһиктии баайан норуот уопсай сомоҕолоһуутун, үрдүккэ-сырдыкка сайдыытын туоһулууллара.
Маны таһынан салама ыарахан санааттан, кырыыс тылтан, сытыы харахтан ыраастыыр, арчылыыр, араҥаччылыыр сүдү күүстээҕин бэлиэтииллэр. Ол гынан сиэргэ-туомҥа өрүү туһаналлар. Бэл диэтэр ыарыһах киһи үтүөрэригэр саламаны ыйаан ыраас эниэргийэни тардан ыарыыны халбарыталлара.
Саха саламата киһини дьаҥтан-дьаһахтан харыстыыр ураты харысхал. Маннык ураты харысхалы киһи бэйэтэ оҥостон укта сылдьыан, биитэр көстүбэт гына кэтэ сылдьыан сөп. Маннык тус суолталаах харысхаллары дьиэҕэ киһи хараҕа хатаммат сиригэр уураллар.
Салама – бу биһиги былыргыбыт, билиҥҥибит уонна кэскилбит ситимэ. Киниэхэ биһиги төрүт өйбүт-санаабыт барыта иҥпит. Билиҥҥи дьалхааннаах олохпутугар өбүгэлэрбит дириҥ муударастарын туһанары олус туһааннааҕынан ааҕабын. Онон, силис тардыбыт өбүгэ үгэһин умнубакка дириҥ ис хоһоонноох сиэрбитин-туоммутун харыстыыр аналбытын, үйэлэргэ үйэтитэр көлүөнэттэн көлүөнэҕэ биэрэр үрдүк аналбытын умнумуоҕуҥ!
Ааптар Анастасия Бережнова,
хаартыска: Жанна Константинова